Թուրքական Taraf թերթը զարմանք ու վրդովմունք է հայտնում, որ հուլիսի 20-ին Շանլըուրֆա (Ուրֆա) նահանգի Սուրուչի շրջանում իրականացված ահաբեկչությունից հետո Թուրքիայում ազգային սուգ չի հայտարարվել։ Այդ ահաբեկչության հետևանքով զոհվել էր 32 և վիրավորվել էր ավելի քան 100 մարդ։
Թերթն ընդգծում է, որ Թուրքիայի իշխանությունները չեն տեսնում դրա անհրաժեշտությունը։ Սակայն Twitter սոցցանցում ակցիա է անցկացվում՝ Սուրուչի պայթյունի կապակցությամբ երկրում ազգային սուգ հայտարարելու համար։ Թերթը հիշեցնում է, թե վերջին տարիներին երբ և որ դեպքերում է Թուրքիայում հայտարարվել ազգային սուգ։
2012 թվականի հունվար. ինքնահռչակ Հյուսիսային Կիպրոսի թուրքական հանրապետության հիմնադիր նախագահ Ռաուֆ Դենքթաշի մահվան կապակցությամբ Թուրքիայում հայտարարել են քառօրյա ազգային սուգ։
2014 թվականի մայիս. Սոմայի հանքավայրի աղետի կապակցությամբ, որին զոհ գնաց 301 հանքափոր, Թուրքիայում հայտարարվել է եռօրյա ազգային սուգ։
2014 թվականի հուլիս. Գազայի հատվածի դեմ Իսրայելի իրականացրած ռազմական գործողության կապակցությամբ, որի ընթացքում զոհվեց 1800 պաղեստինցի, Թուրքիայում հայտարարվել է եռօրյա ազգային սուգ։
2014 թվականի դեկտեմբեր. Պակիստանի Փեշավար քաղաքում «Թալիբանի» իրականացրած հարձակման հետևանքով սպանվեց 145 մարդ, որոնց մեծ մասը՝ երեխաներ։ Դրա հետ կապված՝ Թուրքիայում հայտարարվել է մեկօրյա ազգային սուգ։
2015 թվականի հունվար. Սաուդյան Արաբիայի թագավոր Աբդուլլահ բին Աբդուլազիզ էլ Սաուդի մահից հետո Թուրքիայում հայտարարվել է մեկօրյա ազգային սուգ։
2015 թվականի հունիս. Թուրքիայի 9-րդ նախագահ Սուլեյման Դեմիրելի մահից հետո Թուրքիայում հայտարարվել է եռօրյա ազգային սուգ։
Հիշեցնենք, որ սրանից առաջ քրդամետ «Ժողովուրդների դեմոկրատական» կուսակցության (ԺԴԿ) համանախագահ Սելահաթթին Դեմիրթաշը հայտարարել է, որ առանց պետական աջակցության, Թուրքիայում անհնար է իրականացնել այնպիսի պայթյուն, ինչպիսին որ գրանցվել է Սուրուչի շրջանում։
