Ֆրանսիայում չորեքշաբթի ահաբեկչական ակտեր պատրաստելու կասկածանքով ձերբակալված 4-հոգանոց խումբը ծրագրել է ֆրանսիացի բարձրաստիճան զինվորականի առևանգում և սպանություն: Այսպիսի տեղեկություն այսօր հայտնել է BFM հեռուստաալիքը՝ հղում անելով իր աղբյուրներին ոստիկանությունում:
Հաղորդվում է, որ ահաբեկիչները մտադիր են եղել հարձակվել «Ֆորտ Բեար» դեսանտայինների պատրաստության կենտրոնի վրա, որը գտնվում է Կոլյուր քաղաքի մոտ: Այս տեղեկությունը հաստատում են նաև France Info ռադիոկայանը և I-Tele հեռուստաալիքը:
ԶԼՄ-ների տեղեկությամբ՝ ահաբեկիչները ծրագրել են առևանգել բարձրաստիճան զինվորականի, հետո սպանել նրան՝ գլուխը կտրելով, հետո այդ տեսանյութը տարածել բնակչությանը վախեցնելու համար: Հանցագործությունը ծրագրված է եղել այս տարվա դեկտեմբերի կամ հաջորդ տարվա հունվարի համար:
Ահաբեկիչների առաջնորդը, ինչպես ավելի վաղ հայտնել է Ֆրանսիայի ՆԳՆ ղեկավար Բեռնար Կազնևը, ինքը նախկին զինվորական է՝ ծառայել է ռազմածովային ուժերում, բայց 1 տարի առաջ հեռացվել է հոգեկան վիճակի վատացման պատճառով: ԶԼՄ-ների վերջին տվյալներով՝ 23-ամյա տղամարդը ծառայել է հենց «Ֆորտ Բեար»-ում և ծրագրել է իր նախկին ղեկավարի առևանգումն ու սպանությունը: Այդ խմբի մյուս անդամները 16, 17 և 19 տարեկան են:
Ֆրանսիական ԶԼՄ-ների տեղեկությամբ՝ ձերբակալվածներից ամենափոքրը հինգշաբթի օրը ազատվել է կալանքից: Տվյալ գործով նախնական հետաքննությունը կատարում է Փարիզի դատախազությունը:
