Եգիպտոսի կառավարությունը պարտավորվել է ուժեղացնել օտարերկրյա դիվանագիտական ներկայացուցչությունների պաշտպանությունը՝ ահաբեկչական սպառնալիքների հետ կապված: Այս մասին երկուշաբթի օրը հայտարարել է Եգիպտոսի ԱԳՆ նախարար Սամեխ Շուքրին պաշտոնական այցով Կահիրեում գտնվող Իտալիայի արտգործնախարար Պաոլո Ջենտիլոնիի հետ համատեղ ասուլիսի ժամանակ: Երկուշաբթի օրը Ջենտիլոնին այցելել է իր երկրի դեսպանատուն, որը տուժել էր ահաբեկչությունից, և զրուցել իր աշխատակիցների հետ:
Կահիրեում Իտալիայի դեսպանատան մոտ պայթյունը տեղի է ունեցել շաբաթ առավոտյան: Վերջին տվյալներով՝ պայթյունի հետևանքով սպանվել է մեկ եգիպտացի ոստիկան, ևս 9 մարդ ծանր վնասվածքներ է ստացել: Ավերվել է դեսպանատան դիմային պատի մի հատվածը: Ահաբեկչության պատասխանատվությունը իր վրա է վերցրել ԴԱԻՇ-ը:
«Ես հաստատել եմ, որ Եգիպտոսի կառավարությունը միջոցներ է ձեռնարկել դիվանագիտական ներկայացուցչությունների պաշտպանության համար՝ հաշվի առնելով ահաբեկիչների հետապնդած վտանգավոր նպատակները»,- հայտարարել է Շուքրին:
Իր հերթին իտալացի նախարարը նշել է, որ այս ահաբեկչությունը ոչ միայն չի ազդի երկու երկրների հարաբերությունների վրա, այլև կուժեղացնի Հռոմի և Կահիրեի միջև համագործակցությունը ահաբեկչության դեմ պայքարում:
