«Եթե բախումները, լարվածությունը բացառվեն տարածաշրջանում, կարող ենք հայտնվել օրինակելի երկրի կարգավիճակում: Կարծում եմ՝ ժողովրդավար երկրներին հարիր և համահունչ ակցիա է. որևէ երկրում եթե սակագնի բարձրացման համապատասխան որոշում լինի, նույն արձագանքը կլինի»,- «Առաջին լրատվական»-ի հետ զրույցում ասաց Լիբանանում հրատարակվող «Ազդակ» օրաթերթի գլխավոր խմբագիր Շահան Գանտահարյանը՝ հավելելով, որ Սփյուռքը հետևում է Հայաստանում տեղի ունեցող իրադարձություններին:
Ըստ նրա՝ էլեկտրաէներգիայի թանկացման դեմ ակցիան աննախադեպ է քաղաքացիական խմբավորումների ակտիվացման առումով: Հատկանշական է նաև այն, որ պայքարողների մեծամասնությունը երիտասարդներ են: «Այստեղ հստակ է, խնդիրը ավելի քաղաքացիական բնույթ ունի, քան քաղաքական, պահանջների մեջ քաղաքական ուղղվածություն չկա: Շատ կարևոր է, որ արտաքին շահագրգռություններ, շահարկումներ չլինեն»,- մանրամասնեց նա:
Շահան Գանտահարյանը կարևորեց այն, որ թե՛ ոստիկանները, թե՛ ակցիայի մասնակիցները չգնան լարվածության և օրինական լինեն թե՛ բողոքողների, թե՛ վերահսկողների առումով: «Կարծում եմ, որ պետք է բացառել ուժի անհամաչափ կիրառումը և տպավորություն չթողնել, որ հակաիրավաչափ են ոստիկանների գործողությունները»,- նշեց նա:
Խմբագիրը նաև նշեց, որ եթե քաղաքացիական այս դրսևորումների ծավալը մնա քաղաքացիական պահանջների մեջ, ապա երկիրը Էականորեն կշահի, ինչի համար անհրաժեշտ է, որպեսզի ակցիայի մասնակիցների պահանջներին իշխանությունները ընդառաջ գնան: «Հուսով եմ՝ հաշվի կնստեն պահանջների հետ: Նախադեպեր կան. շատ ավելի փոքր ծավալի ակցիաներ են եղել, երբ իշխանությունները ընդառաջ են գնացել: Եթե այս փաստի, այս երևույթի հետ հաշվի նստեն, կարող ենք արդյունքի հասնել»,- եզրափակեց նա: