Ադրբեջանական Salam News կայքի հաղորդմամբ, «Թալիբան» շարժումը կարող է իր ներկայացուցչությունը բացել Թուրքիայում` Աֆղանստանի կառավարության հետ երկխոսություն սկսելու համար: Տվյալ խնդրի շուրջ բանակցությունները շարունակվում են:
Թուրքական Hürriyet թերթին տված հարցազրույցի ժամանակ այս տեղեկատվությունը հաստատել է Էրդողանի գլխավոր օգնական Իբրահիմ Քալընը. «Ներկայումս մենք բանակցում ենք «Թալիբան» շարժման հետ: Մենք պլանավորել ենք նրա գրասենյակը հիմնել Ստամբուլում»:
Թուրքական Akşam թերթի փոխանցմամբ, այդ տեղեկատվությունը հաստատել է նաև արտգործնախարար Ահմեդ Դավութօղլուն, որը մարտին տվյալ խնդրի շուրջ բանակցություններ է վարել Աֆղանստանի նախկին նախագահ Բուրհանուդդին Ռաբբանիի հետ:
Այդ հանդիպման ժամանակ Դավութօղլուն հայտարարել էր. «Աֆղանստանին առնչվող գործընթացում մենք պատրաստ ենք անել մեզանից կախված ամեն ինչ: Եթե թալիբները ցանկանում են ներկայացուցչություն բացել, ապա Թուրքիան կաջակցի դրան` օգտագործելով իր բոլոր հնարավորությունները»:
Նշվում է, որ «Թալիբան» շարժման ու Համիդ Քարզայի երկխոսության նախաձեռնությունը պատկանում է ԱՄՆ-ին, սակայն պետդեպարտամենտը դեռևս պաշտոնապես չի հաստատել դա:
Հիշեցնենք, որ նախկինում խոսվում էր, թե թալիբները մտադիր են աֆղանական իշխանությունների հետ բանակցել չեզոք երկրներում, որոնց թվում նշվում էին նաև ԱՄԷ-ն ու Տաջիկստանը:
Փաստորեն, Թուրքիան հերթական անգամ հակամարտող կողմերին առաջարկում է իր միջնորդական ծառայությունները, ինչը կնպաստի նրա տարածաշրջանային դերի ամրագրմանն ու միջազգային վարկի բարձրացմանը:
