Այս պահին նախագահական նստավայրի դիմաց անցկացվում է բողոքի թեժ ակցիա: Բանակում խաղաղ պայմաններում զոհված զինծառայողների ծնողները հավաքվել են նախագահին հիշեցնելու տարիներ առաջ տված խոստման մասին, ըստ որի՝ իրենց որդիների սպանության գործերը կբացահայտվեն։ Ոստիկանները, սակայն, պատ են կազմել և թույլ չեն տալիս, որպեսզի որդեկորույս մայրերը առաջ շարժվեն:
Ոստիկանները պաշարել են նախագահական նստավայրը ամբողջ երկայնքով և չեն պարզաբանում, թե օրենքի որ կետի համաձայն սևազգեստ մայրերը չեն կարող մոտենալ նստավայրին:
ՄԻՊ ներկայացուցչի հետ զրույցում ոստիկանները պատճառաբանել են, որ շենքին անհարիր արտահայտություններ են արվում: Նրանք նաև նշում են, որ սևազգեստ մայրերը տրորում են նախագահական շենքի դիմացի ծաղիկները, և բռնի կերպով մայրերին հեռացրել են նախագահական դարպասների մոտից: Տեղի է ունեցել բախում սևազգեստ մայրերի և ոստիկանների միջև: Սևազգեստ մայրերը ծաղիկներ կտրեցին-շպրտեցին՝ ասելով ծաղիկների մասին եք մտածում, մեր «ծառերն» են կտրել:
Այս պահին զոհված զինծառայողների ծնողները շարժվում են դեպի ՄԻՊ գրասենյակ, քանի որ ՄԻՊ ներկայացուցիչը չի կարողացել ապահովել խաղաղ ակցիա անցկացնելու նրանց պահանջը:
