Թուրքական Hürriyet թերթի փոխանցմամբ՝ ԱՄՆ պետդեպարտամենտը շնորհավորել է Թուրքիայի ժողովրդին՝ հունիսի 7-ի ընտրություններին բարձր մասնակցություն ունենալու համար:
ԱՄՆ պետդեպարտամենտի խոսնակ Ջեֆ Ռատկեն ընդգծել է, որ ընտրությունների մասնակցության ցուցանիշը կազմել է 86 տոկոս, ինչը ռեկորդային մակարդակ է Թուրքիայի համար:
Ռատկեն ժողովրդի կողմից սեփական կամքը հայտնելու այդ ցուցանիշը կարևորել է ժողովրդավարության շարունակման տեսանկյունից:
Վերջինս ընդգծել է, որ ԱՄՆ-ը մեծապես սպասում է ՆԱՏՕ-ի գծով իր դաշնակից երկրում նոր խորհրդարանի ու կառավարության հետ աշխատելուն:
Նա նկատել է, որ ընտրությունների արդյունքներով որևէ կուսակցության չի հաջողվել ձևավորել միակուսակցական կառավարություն, և որ ԱՄՆ պետքարտուղար Ջոն Քերին մինչ այժմ որևէ շփում չի ունեցել թուրքական կողմի հետ:
Թերթը հիշեցնում է, որ ԱՄՆ նախագահ Բարաք Օբաման դեռ չի շնորհավորել թուրքական կողմին: 2011 թվականին Թուրքիայում անցկացված խորհրդարանական ընտրությունների հենց հաջորդ օրն ԱՄՆ պետդեպարտամենտը հանդես էր եկել դրան նվիրված հայտարարությամբ, իսկ Օբաման երեք օր անց շնորհավորել էր Թուրքիայի՝ այդ ժամանակ վարչապետ Ռեջեփ Էրդողանին:
Թերթն ընդգծում է, որ Օբաման այս տարի Իտալիայում անցկացված նախագահական ընտրություններից հետո նույն օրը շնորհավորել է ընտրություններում հաղթած Սերժիո Մատարելային, ինչպես նաև այս տարի Շրի Լանկայում և նախորդ տարի Ճապոնիայում անցկացված ընտրություններում Օբաման զանգահարել է դրանց հաջորդ օրն իսկ:
Թերթն ուշադրություն է հրավիրում այն հանգամանքին, որ Օբաման մինչ այժմ չի զանգահարել Դավութօղլուին, ինչ նա դարձել է Թուրքիայի վարչապետ (2014 թվականի օգոստոսի վերջ):
