«Ես խորապես համոզված եմ, որ Ադրբեջանը միշտ ցանկացել է ամեն ինչ անել, որպեսզի Մինսկի խմբի ձևաչափը փոխվի, որովհետև Թուրքիայի հետ իրենք նույն ժողովուրդն են, նույն ազգն են, բայց դրանք ապարդյուն ջանքեր են: Դա չի ստացվելու, քանի որ դա միայն Բաքվի ցանկությամբ չի լինում»,- այսօր «Առաջին լրատվական»-ի հետ զրույցում անդրադառնալով Բաքվում ԵԱՀԿ գրասենյակի փակմանը՝ կարծիք հայտնեց «Հանրապետություն» կուսակցության նախագահ Արամ Սարգսյանը:
Անդրադառնալով առաջիկայում Բաքվում սպասվելիք Ալիև-Էրդողան-Պուտին հանդիպմանը՝ Սարգսյանն ասաց, որ եռյակի հանդիպումից ոչ մի լավ բան չի կարելի սպասել, քանի որ երեքն էլ իրենց պետությունները ղեկավարում են հետադիմական հայացքներով, և իրենց ղեկավարման ժամանակահատվածում այդ պետությունները հետ են գնացել թե ժողովրդավարության, թե մարդու իրավունքների առումով:
«Եթե երեք հետադիմականներ հավաքվում են, ապա աշխարհը, առավել ևս՝ մենք, որևէ լավ բանի սպասելիք չենք կարող ունենալ: Չնայած որ այնտեղ որևէ լուրջ մերձեցում էլ չի լինի, քանի որ երեքն էլ ինքնասիրահարված անձինք են»,- հավելեց Սարգսյանը:
Պարոն Սարգսյանն անդրադարձավ նաև հոսանքի թանկացմանը: Նրա խոսքով՝ խայտառակություն է, երբ պետությունը իր պետական սեփականությունը մասնավորեցնում է և տալիս այլ պետության. դա հիմարություն է, և այդ ժամանակվա ղեկավարներին այլ կերպ բնորոշել անհնարին է:
«Մենք 100 միլիոն պարտք էինք մնացել Ռուսաստանին, և այդ 100 միլիոնի դիմաց Ռուսաստանը մեզնից գույք վերցրեց: Հիմա Ռուսաստանը՝ հանձին իր ընկերության, պարտք է մնացել, և մենք բացարձակ պարտավոր չենք իրենց կրած վնասների համար հատուցել: Ռուսական ընկերությունը պարտք է մնացել. գումար չունեն՝ թող գույքով վճարեն։ «Գույք պարտքի դիմաց»՝ ոնց որ այն ժամանակ: Մեր պետությունը պետք է այս ճանապարհով գնա»,- ասաց Սարգսյանը:
Այս և ներքաղաքական մի քանի այլ հարցերի շուրջ Արամ Սարգսյանի հետ մեր զրույցն առավել մանրամասն՝ տեսանյութում։
