Այսօր Ազգային ժողովում լրագրողները Ֆինանսների նախարար Գագիկ Խաչատրյանից հետաքրքրվեցին, որ վարչապետ Հովիկ Աբրահամյանը դեռ մեկ տարի առաջ հայտարարել էր, որ իրենք ամեն ինչ անելու են ստվերի դեմ պայքարելու և բոլորին հարկային դաշտ բերելու համար, այժմ ստվերի դեմ պայքարի ինչ արդյունքներ կան: «Ստվերի գնահատականը Ֆինանսների նախարարության ֆունցիաների մեջ որպես այդպիսին չի մտնում, դրանք ավելի բարդ մեթոդոլոգիա ունեցող խնդիրներ են, կան միջազգային կառույցներ, որոնք գնահատում են»,- նշեց նա, իսկ որպես ոլորտ բերեց բջջային օպերատորներին և առևտրի ոլորտը:
Լրագրողները հետաքրքրվեցին, թե Սամվել Ալեքսանյանին և Սաշիկ Սարգսյանին որքանո՞վ է հնարավոր եղել հարկային դաշտ բերել, վերջինս էլ նշեց, որ միայն հսկիչ դրամարկղային խախտումների արդյունքում Սամվել Ալեքսանյանի ընկերությունները տուգանվել և նրանցից գանձվել է 250 միլիոն դրամ. «Որ ասեք Ալեքսանդր Սարգսյանը ի՞նչ բիզնեսներ ունի ես կասեմ… չունի որևէ բիզնես»,- նշեց Խաչատրյանը:
