Հայաստանն ու Բելառուսը հրաժարվել են ստորագրել «Արևելյան գործընկերության» գագաթնաժողովի ամփոփիչ հայտարարությունը, քանի որ նրանում պարունակվում է արտահայտություն Ղրիմի բռնակցման մասին։ Այս մասին հայտնում է Reuters-ը՝ հղում անելով իր դիվանագիտական աղբյուրներին։
Ռուսաստանի կողմից թերակղզու անօրինական բռնակցման մասին արտահայտությունը եղել է փաստաթղթի նախնական տեքստում։ Երևանի և Մինսկի դիրքորոշման պատճառով, ըստ գործակալության տեղեկատվության, կմշակվի փոխզիջումային հայտարարություն, որում ԵՄ-ի և «Արևելյան գործընկերության» մասնակից երկրների դիրքորոշումները կներկայացվեն առանձին։
Ըստ գործակալության տեղեկությունների՝ փաստաթղթում կխոսվի այն մասին, որ ԵՄ-ն դատապարտում է Ղրիմի միացումը Ռուսաստանին։
Հայտարարության սևագիր տեքստը կքննարկվի գագաթնաժողովին՝ հինգշաբթի։
«Արևելյան գործընկերության» գագաթնաժողովը կկայանա Ռիգայում մայիսի 21-22-ը։
