Վերջին ժամանակներս Մերձավոր Արևելքի անկայուն վիճակը դարձել է սովորական երևույթ: Սակայն, առաջ նավթարդյունահանող խոշոր երկրներում՝ օրինակ Իրաքում, ցանկացած ռազմական գործողություն կամ նույնիսկ այդ մասին ակնարկը անմիջապես բերում էր նավթի գների աճի: Այս մասին գրում է vestifinance.ru-ն:
Սակայն, ներկայում աշխարաքաղաքական անկայուն վիճակն ավելի քիչ նշանակություն ունի, քան առաջ, հաշվի առնելով նավթի շուկայի հագեցվածությունը:
Անցած շաբաթ ԻՊ զորքերը գրավեցին Ռամադին՝ Ալ Անբար շրջանի ամենակարևոր քաղաքը: Չնայած ԱՄՆ-ի օդային աջակցությանը` Իրաքի ուժերը նահանջեցին: Սակայն, դա չազդեց Իրաքի նավթի արտահանման ծավալների վրա, որովհետև Իրաքի նավթի պաշարների մեծամասնությունը գտնվում է այդ տեղից շատ հարավ՝ Պարսից ծոցի մոտ գտնվող Բասրա շրջանում և առայժմ խոշոր նավթային հանքավայրերը անմիջական վտանգի տակ չեն գտնվում:
Ի դեպ, անցյալում այդպիսի փաստերը չէին կանգնեցնում նավթի շուկայում գների սրընթաց աճը: Բայց երկուշաբթի՝ մայիսի 18-ին, նավթի շուկայում գնի տատանում չի գրանցվել:
Դրա համար կա երկու գլխավոր պատճառ: Առաջին, նավթի համաշխարհային պահանջարկը մնում է կայուն, և երկրորդ, նավթի պաշարներն այնքան մեծ են, որ շատ ժամանակ է պետք իրադրության փոփոխության համար: Մոտակա ժամանակներում նավթի դեֆիցիտ հնարավոր չէ, միաժամանակ Իրաքում նավթի արդյունահանումը նշանակալիորեն ավելացել է:
Իրաքի տնտեսության համար շատ կարևոր է ավելի շատ նավթ վաճառելու հնարավորությունը: Իրաքը նախատեսում է օրական 700 հազար բարելով ավելացնել արտահանվող նավթի ծավալը: Հենց այդ պատճառով էլ ԻՊ-ն այլևս շատ ազդեցություն չունի գների վրա: Ի տարբերություն անցյալ տարվա, երբ քչերը գիտեին թե ինչ է իրենից ներկայացնում ԻՊ-ն, այժմ նավթավաճառները ընդհանրապես էլ չեն անհանգստանում Իրաքի նավթի մատակարարումների վերաբերյալ:
