Սյունիքի մարզպես Սուրիկ Խաչատրյանի որդու՝ Տիգրան Խաչատրյանի մասնակցությամբ ծեծկռտուքից օրեր անց աշխատանքից ազատվեց Գորիսի ոստիկանապետ Արա Դավթյանը: Որքան էլ պաշտոնապես հերքվի, թե ոստիկանապետի ազատումը կապված չէր միջադեպի հետ, և ընդամենը 1 ամիս առաջ Գորիսի ոստիկանապետ նշանակված Դավթյանի ազատման պատճառը «կադրային փոփոխությունն է», սակայն մեզ հասած տեղեկություններով, ազատման պատճառն անմիջականորեն կապված է մայիսի 2-ի միջադեպի հետ:
Մասնավորապես , դեպքից անմիջապես հետո, երբ ծեծված Հարութ Զաքարյանի հայրը՝ Գագիկ Զաքարյանը ինչ-ինչ պատճառներից ելնելով ասել էր, թե ավտոմեքենայի վրա գործ անելու ժամանակ որդու աչքին քար է դիպել և Տիգրան Խաչատրյանը կապ չունի կատարվածի հետ, ոստիկանապետն էլ առիթից օգտվելով փորձել է այդ վարկածը ներկայացնել որպես պաշտոնական: Այսինքն` նախապատրատվող նյութերով նույնպես ձևակերպել այդ վարկածը:
Սակայն, երբ կարճ ժամանակ անց Հարութի մայրը, նրա ընկերները, ապա նաև հայրը վստահաբար հայտարարեցին, որ Հարութին ու եղբորը ծեծի է ենթարկել մարզպետի որդին իր բանդայի հետ, ոստիկանապետը հայտնվել է մեղմ ասած` աննախանձելի վիճակում և նրա՝ մարզպետին հաճոյանալու ու նրա որդու կաշին փրկելու փորձերը զայրացրել է ՀՀ ոստիկանապետին, ինչն էլ դարձել է վերջինիս ազատման պատճառը:
Հիշեցնենք, որ դեպքը տեղի է ունեցել մայիսի 2-ին, Գորիս քաղաքի «Սըդղի գյոլ» կոչվող տարածքում: Սուրիկ Խաչատրյանի որդու մասնակցությամբ ծեծի հետևանքով Հարութ Զաքարյանը կորցրել է աչքի տեսողությունը, մյուս եղբայրը՝ ստացել է տարբեր աստիճանի վնասվածքներ: Գործով նախաքննություն է իրականացվում: ՀՀ ոստիկանությունն առ այսօր չի ստացել մարզպետի որդուն բերման ենթարկելու որոշում:
