Մխիթար Հերացու անվան պետական բժշկական համալսարանի ռազմաբժշկական ֆակուլտետում այսօր տեղի ունեցավ թանգարանի բացման արարողություն, որին նիստերի դահլիճում հաջորդեց հանդիսավոր միջոցառում՝ նվիրված մայիսյան հաղթանակներին:
Միջոցառմանը ներկա էր ՀՀ պաշտպանության նախարար Սեյրան Օհանյանը, ով շնորհավորեց ներկաներին Եռատոնի կապակցությամբ:
Միջոցառման ավարտից հետո Օհանյանը լրագրողների հետ զրույցում անդրադարձավ սահմանին տիրող իրավիճակին և նշեց, որ այն համեմատաբար հանգիստ է. «Կրակոցները քիչ են, հարևանի կողմից սադրանքի փորձեր չկան:
Երևի թե երկու հանգամանք կարող է ազդած լինել՝ առաջին հերթին Ադրբեջանում առկա քաղաքական իրավիճակը։ Երկրորդ՝ իրականում մեր հարևանները հասկանում են, որ պետք չէ գնալ այդ քայլերին, պետք է մտածել հակամարտությունը խաղաղ ճանապարհով լուծելու մասին: Եթե հասկանան՝ փառք իրենց, եթե ոչ, ապա մենք միշտ պատրաստ ենք մեր հայրենիքի սահմանները պաշտպանել»,- ընդգծեց նախարարը:
Նախարար Օհանյանն անդրադարձավ նաև ՊԲ պայմանագրային զինծառայող Արսեն Բաղդասարյանին Ադրբեջանում 15 տարվա ազատազրկման դատապարտելու հանգամանքին. «Ադրբեջանի նպատակը մեկն է՝ ցույց տալ, որ մենք ունենք զինծառայողներ, որ փորձ են արել Ադրբեջանի տարածքում դիվերսիոն գործողություններ իրականացնել, և դա հակադրել այն հանցագործներին, որոնք իրականում ԼՂ Քարվաճառի տարածքում անօրեն գործունեություն են իրականացրել, անմեղ մարդկանց սպանել: Սա նաև արտաքին աշխարհի քարոզչության նպատակ ուներ»,- եզրափակեց նա:
