Հայաստանի ազգային հավաքականի հարձակվող Յուրա Մովսիսյանն ՈւԵՖԱ-ի պաշտոնական կայքի հետ զրույցում նշել է, որ չի կարծում՝ թիմը հաջողության կհասնի Ռուսաստանի Պրեմիեր լիգայի ընթացիկ մրցաշրջանում:
« «Սպարտակ»-ը միշտ բարձր առաջադրանքներ է սահմանում: Այլ կերպ չի կարող լինել: Թիմը հարուստ պատմություն ու հնչեղ անուն ունի: Բայց առաջադրանքը կատարելու ու չեմպիոն դառնալու համար պետք է համապատասխան թիմ ունենալ:
Յուրաքանչյուր դիրքում պետք է լինի ոչ թե մեկ, այլ առնվազն երկու բարձրակարգ ֆուտբոլիստ: Մրցաշրջանը երկարատև է, և ամեն ինչ կարող է տեղի ունենալ: Օրինակ՝ վնասվածքը: Իսկ փոփոխությունը պետք է համարժեք լինի: Կարծում եմ՝ հիմա չենք կարող պայքարել ոսկե մեդալի համար, բայց հուսով եմ՝ դա կանենք ապագայում:
Ցանկանում եմ, որ «Սպարտակ»-ը միշտ առաջինը լինի: Բայց թե որ տեղը կզբաղեցնենք այս մրցաշրջանում կամ հաջորդում, ոչ ոք չի կարող ասել:
Կարող եմ հաստատել միայն մեկ բան՝ «Սպարտակ»-ը յուրաքանչյուր խաղում ու յուրաքանչյուր մրցաշրջանում սահմանում է միայն մեկ նպատակ՝ հաղթել: Ժամանակը ցույց կտա՝ ի վերջո որ տեղը կզբաղեցնենք»:
