Ադրբեջանական Day.az կայքի փոխանցմամբ, ադրբեջանցի խորհրդարանական Նիզամի Ջաֆարովն անդրադարձել է ղարաբաղյան հիմնախնդրին` նշելով, որ վերջին շրջանում աճել եվրոպական կառույցների հետաքրքրությունը դրա նկատմամբ.
«Ես դա կապում եմ Ադրբեջանի հանդեպ աճող հետաքրքրության հետ: Եվրոպայում տեսնում են Ադրբեջանի գրանցած տնտեսական հաջողությունները և ցանկանում են համագործակցել նրա հետ:
Գնալով աճում է տարածաշրջանում Բաքվի դերը, ինչն էլ եվրոպական կառույցներին մղում է Ադրբեջանի հետ շփումների ակտիվացմանը: Եվրոպան կարիք ունի տարածաշրջանային ամենակարևոր խնդիրների նկատմամբ Ադրբեջանի ունեցած դիրքորոշման մասին ամբողջական տեղեկատվության:
Սակայն չպետք է հույս դնել նրա վրա, որ ղարաբաղյան հարցում եվրոպական կառույցները կաջակցեն Ադրբեջանին: Գերտերությունները ցայժմ երկակի, երբեմն նաև եռակի ստանդարտներ են կիրառում: Եվրոպական կառույցների հետ աշխատանքներ են տանում ոչ միայն Բաքուն, այլև` Թբիլիսին և Երևանը:
Այնուամենայնիվ, ես առավել հակված եմ նրան, որ Եվրոպան մտադիր է զբաղվել ոչ թե ղարաբաղյան հակամարտության կարգավորմամբ, այլ դրա վրա վերահսկման բանալիների հայտնաբերման փնտրտուքով: Եվրոպան երկրագնդի «թեժ կետերի» նկատմամբ համակարգային մոտեցման կարիք է զգում»:
Հիշեցնենք, որ օրեր առաջ գերմանական Frankfurter Rundschau թերթում հրապարակված Նադյա Էրբի «Կովկասում պատերազմի վտանգի առաջացումը» խորագրով հոդվածում նշված էր, որ միջազգային հանրությունը և, որ առավել կարևոր է, ԵՄ-ը Ղարաբաղի հարցում մի կողմ են քաշվել, քանի որ պատերազմի հրձիգ Ադրբեջանն իրենց համար կարևոր գործընկեր է Կենտրոնական Ասիայից դեպի Եվրոպա նավթի մատակարարման և Nabucco նախագծի իրականացման հարցում:
