«Թող Քիմին ընդունեին շոու-բիզնեսի ներկայացուցիչները, ծայրահեղ դեպքում՝ մշակույթի նախարարը, բայց ոչ թե վարչապետը»,- «Առաջին լրատվական»-ի հետ զրույցում ասաց «Հայաստանի Սոցիալիստական շարժում» ՀԿ նախագահ Ռոբերտ Ահարոնյանը:
Ըստ նրա՝ լավ է, որ Քիմը եկել է, բայց նրան պետական մակարդակով չպետք է ընդունեին՝ ոստիկանների շարասյուն, բազմաթիվ մեքենաներ կցեին, հետևից Գեղարդ գնային։
«Ցավում եմ, բայց Շարլ Ազնավուրին երբեք այսպես չենք ընդունել։ Նորմալ է, չեմ ուզում Քիմին վիրավորել, թող գա, իր գործն անի, ծաղիկ դնի հուշահամալիրին, բայց սենց պետական ընդունելություն…»,- ասաց Ռ. Ահարոնյանը:
Նա նշեց, որ Քիմ Քարդաշյանը գուցե վարչապետի, պետական այրերի դուրը գալիս է, ինչը նորմալ է՝ տղամարդ են, բայց չպետք է մոռանան, որ պետական պաշտոնյա են։
«Նորմալ է՝ գեղեցիկ կին է, բոլորը երևի կուզեն Քիմ Քարդաշյանին ձեռք տալ, նորմալ է, դրա մեջ վատ բան չեմ տեսնում, բայց այդպիսի մակարդակով ընդունել, հրավիրել, նստեցնել մի սեղանի շուրջ, որտեղ որ դու լուծում ես պետական հարցեր… Քիմ Քարդաշյանի դեմ ոչինչ չունեմ, բայց չափը մենք չպետք է կորցնեինք։ Քարդաշյանի հետույքով Ցեղասպանություն ենք ճանաչում ու պարծենում. ես ապշած եմ»,- ասաց նա:
Ռ. Ահարոնյանը նաև նշեց՝ այն, որ Քիմ Քարդաշյանի գալով ամբողջ ՀՀ հրապարակը լցվեց երիտասարդությամբ, նրան պետական մակարդակով այս ու այն կողմ տարան, պոռնկության, էրոտիկայի պրոպագանդա է. «Ես չեմ ասում, որ Քիմը մարմնավաճառ է, բայց սա այլ հարց է, արժեքները ոտնահարում ենք»:
Ռոբերտ Ահարոնյանը նաև ընդգծեց, որ Քիմ Քարդաշյանին ընդունելով՝ Հովիկ Աբրահամյանը ցանկանում էր ճանաչում ձեռք բերել։ «Եթե հեռուստաընկերությունն իր մեկնաբանությունների մեջ թույլ է տալիս ասել, որ Հայաստանը ճանաչեցին Քիմ Քարդաշյանով, միլիոնավոր մարդիկ ԱՄՆ-ում, Եվրոպայում հետևում են ու իմանում են, որ կա Հայաստան, ուրեմն շատ հնարավոր է, որ Հովիկ Աբրահամյանը Քիմ Քարդաշյանով ուզում էր ճանաչում ձեռք բերել. այդ տրամաբանությամբ, պատկերացրեք, միլիոնավոր մարդիկ իմացան Հովիկ Աբրահամյանի անունը»,- ասաց նա:
Մանրամասները՝ տեսանյութում։
