Ձյունտենդո համալսարանի ճապոնացի գիտնականներին հաջողվել է վերականգնել ի ծնե խուլ մկների լսողությունը գենային թերապիայի օգնությամբ։ Այս մասին հայտնում է TASS-ը՝ հղում անելով տեղական ԶԼՄ-ներին:
Փորձի ընթացքում մասնագետները կրծողներին ներարկել են Gjb2 անվանումով գենը: Դրանից հետո մկների մոտ հայտնվել է սերունդ, որը այդ գենի պատճառով ծնվում էր ի ծնե խուլ: Ապա ճապոնացի գիտնականները գենային թերապիայի օգնությամբ ազդել էին նորածին կրծողի ականջի վրա:
Արդյունքում կենսաբաններին հաջողվել է մասամբ վերականգնել մկան լսողությունը, և ազդեցության ենթարկված ականջը սկսել է որսալ 70 դեցիբել ուժգնության ձայն՝ այն դեպքում, երբ մյուս ականջը չի արձագանքել անգամ ավելի քան 90 դեցիբել ձայնին:
Հետազոտության ղեկավար պրոֆեսոր Կացուխիսա Իկեդայի խոսքով՝ գիտնականների խումբը պետք է ուսումնասիրի բուժման այդ մեթոդը մարդկանց վրա կիրառելու հնարավորությունը:
Ճապոնիայում մոտ 30 հազար մարդ տառապում է բնածին խլությամբ, որի պատճառը Gjb2 գենի մուտացիան է:
