Արևմուտքը պետք է գիտակցի զենքի օգնությամբ ժողովրդավարության հասնելու անհնարինությունը: Ինչպես հաղորդում է Mehr գործակալությունը՝ այս մասին թուրք գործընկեր Ջամիլ Չիչեքի հետ Տնտեսական համագործակցության կազմակերպության նիստում հայտնել է Իրանի խորհրդարանի խոսնակ Ալի Լարիջանին:
Նրա խոսքով՝ Թուրքիայում Patriot զենիթա-հրթիռային համալիրների տեղակայումը տարաձայնություններ է ստեղծում տարածաշրջանում:
Հանդիպման ընթացքում կողմերը քննարկել են նաև տարածաշրջանում տիրող իրադրությունը: Լարիջանին, նշելով Սիրիայում բարեփոխման անցկացման անհրաժեշտությունը, ընդգծել է, որ զենքի միջոցով անհնար է ժողովրդավարության հասնել:
Չիչեքը հայտարարել է, որ Թուրքիան բազմաթիվ քայլեր է ձեռնարկում սիրիական հակամարտության սկզբից մինչ այսօր՝ խուսափելու համար առճակատումից: Սակայն Թուրքիայի ջանքերը ապարդյուն են: «Patriot զենիթա-հրթիռային համալիրները անհրաժեշտ են Թուրքիային, և դրանց տեղադրումը կրում է պաշտպանական բնույթ: Իրանը չպետք է անհանգստանա այդ առնչությամբ: Եթե Իրանն ու Թուրքիան կարողանան միասին լուծել սիրիական հակամարտությունը, հրթիռները կապամոնտաժվեն»,- ասել է Չիչեքը:
