Թուրքիայի ընտանեկան և սոցիալական հարցերով նախարար Ֆաթմա Շահինը հայտարարել է, որ Ստամբուլում կբացվի հաստատություն` բռնությունների ենթարկված տղամարդկանց համար: Այն գործելու է խիստ գաղտնիության պայմաններում:
Ըստ վիճակագրության՝ թուրք տղամարդկանց 3 տոկոսը ֆիզիկական կամ հոգեբանական բռնության է ենթարկվում թրքուհիների կողմից:
«Ստամբուլում մենք տուժածներից շատ հայտարարություններ ենք ստացել: Դրանց արդյունքում որոշում ենք կայացրել բացել տղամարդկանց համար առաջին հաստատությունը: Ես մշտապես ասում եմ, որ հանդիսանում եմ ընտանեկան հարցերով նախարար, այսինքն նախարար, ով զբաղվում է կանանց, երեխաների և տղամարդկանց հարցերով: Իմ պարտականությունների մեջ մտնում են նաև տղամարդկանց իրավունքներն ու պաշտպանությունը»,- հայտարարել է Ֆաթմա Շահինը:
Շինության կառուցման հիմնաքարի տեղադրման և բացման արարողություններ տեղի չեն ունենա: Հեռախոսահամարներ, հասցե որևէ տեղ նշված չի լինի: Շենքի վրա ևս որևէ ցուցանակ չի լինի, և դրա անվտանգությունը կապահովի ոստիկանությունը:
Հաստատությունում միաժամանակ կարող է մնալ 30 տղամարդ, ովքեր կկարողանան օգտվել նույն հնարավորություններից, ինչ որ կանայք, ովքեր գտնվում են համանման հաստատություններում:
Թուրքիայում տղամարդկանց համար նախատեսված նման հաստատություն կա Կենտրոնական Անատոլիայում: Այն հիմնվել է հասարակական կազմակերպության կողմից, որն օգնում է տնից զրկվածներին և նրանց, ում իրավունքները ոտնահարվել են: Առաջին անգամ է, որ պետությունը նման հաստատության ստեղծման աշխատանքներ է նախաձեռնել։
Ստամբուլը Թուրքիայի ամենախիտ բնակեցված քաղաքն է և հենց դրա պատճառով էլ այս հաստատության հիմնումը որոշվեց սկսել այստեղից: Ստամբուլում և երկրի մյուս խոշոր քաղաքներում նման հաստատություններ կան կանանց համար: Դրանք ևս իրենց այցելուների համար ապահովում են գաղտնիություն:
