Ներկայիս չընտրությունների մասնակիցները բոլորը մտել են այս գործընթացի մեջ իրենց գինը և նշանակությունը բարձրացնելու համար: Այսօր լրագրողների հետ հանդիպման ժամանակ նման տեսակետ հայտնեց կառավարման փորձագետ Հարություն Մեսրոպյանը:
Փորձագետը բերեց երկու գործոն, որոնք ի ցույց են դնում այս չընտրությունների անլրջությունը. մասնակիցներից ոչ մեկը թիմով հանդես չի գալիս՝ թե ովքեր են լինելու վարչապետը, նախարարները, ԿԲ նախագահը: Այսինքն՝ չնայած որևէ այլ թեկնածուի հաղթանակը զրոյական է, բայց եթե ընտրվի այլ թեկնածու, ապա ովքե՞ր են լինելու առանցքային դերակատարները: Երկրորդ՝ որոշ կուսակցություններ հրաժարվեցին մասնակցել ընտրություններին, այսինքն՝ կատարել իրենց հիմնական գործառույթը:
«Եթե հայտարարում են, որ այս ընտրություններում չեն կարող հաղթել, դա նույնպես խոսում է իրենց թուլության մասին: Իսկ եթե կարող են, բայց չեն մասնակցում, ուրեմն իրականում նրանք կուսակցություններ չեն: Եվ այս քարոզարշավին շատ լուրջ վերաբերվել պետք չէ»,- ասաց Հ. Մեսրոպյանը:
Հայրիկյանի հետ կապված՝ փորձագետը նշեց, որ մեզ մոտ դեռ վաղուց են գնում ներքին խաղեր, և սրա նպատակը առնվազն ինտրիգ մտցնելն է, որ այս անհետաքրքիր ընտրությունները հետաքրքիր դառնան և դրսին էլ ցույց տան, թե ընտրությունները մրցակցային են:
Հ. Մեսրոպյանի խոսքով՝ անկախ Հայաստանի օրոք մենք չենք ունեցել գոնե կիսով չափ արդար ընտրություններ. 1991 թ.-ի ընտրություններն անկախ Հայաստանի Հանրապետության ընտրությունները չէին, քանի որ դրանք դեռ սովետական կարգերի օրոք էին:
Մեսրոպյանը նշեց, որ դեռ 2011-ից ՀՀ կառավարման համակարգը սկսել է փլուզվել, և չպետք է դրան խանգարել, պետք է թողնել, որ այդ համակարգը փլուզվի, բայց պետք է զուգահեռ ստեղծել նորը: Ըստ փորձագետի՝ 2015թ.-ին ՝ ±0.5 տարի, կառավարման համակարգի կորի գագաթնակետն է լինելու, որից հետո ՀՀ-ն մտնելու է համակարգային ցնցումների մեջ: Խոր և անդառնալի անկումից խուսափելու համար անհրաժեշտ է, որ «առաջիկա մեկուկես տարում մարդիկ խելքները գլուխները հավաքեն»:
Անդրադառնալով Սերժ Սարգսյանի հայտնի արտահայտություններին՝ Հ. Մեսրոպյանը նշեց, որ համակարգը ավելի շատ է տատանվում, և այդ նոր բառերի, նոր բառապաշարի կիրառումը այդ «տատանումները սվաղելու» համար է:
ՀԱԿ-ում ընթացող գործընթացներին և նոր կուսակցության ստեղծմանը անդրադառնալով՝ փորձագետը նշեց. «Երբ փլուզողները և փրկողները նույն մարդիկ են, արդյունք չի լինի: Օրինակ՝ մարդիկ մնացել են փլատակի տակ, նրանց փրկում են փրկարարները, ոչ թե հենց իրենք: Ոչ միայն քաղաքական համակարգն է փլուզվում, այլ նաև կուսակցությունները, այդ թվում՝ ՀՀԿ-ն»:
«Առաջին լրատվական»-ի հարցին՝ ո՞վ է փրկելու Հայաստանը փլատակների տակից, Հ. Մեսրոպյանը պատասխանեց, որ երիտասարդների մեջ փայլուն կերպարներ կան, ինչը հուսադրող է, և եթե ուզում ենք քանդվող պրոցեսից փրկվել, պետք է սեփական գործընթաց սկսել, ինչպես, օրինակ, դա անում է «Սարդարապատը»՝ իր նախախորհրդարանի օրինակով: «Իրենք չեն խառնվում ընտրություններին ու գնում են իրենց ճանապարհով»,- ասաց փորձագետը:
Լուսանկարը՝ PanARMENIAN Photo-ի
