«Թարիհ» հիմնադրամի և Ֆրանսիական մշակույթի տան նախաձեռնությամբ մարտի 27-ին հայ-թուրքական փակ սահմանի վերաբերյալ «Հաղթահարել սահմանները» խորագրով հանրային քննարկում է անցկացվելու։ Այս մասին գրում է թուրքական «Հաբերլեր» կայքը։
Նախ, մարտի 26-ին Ֆրանսիական մշակույթի տանը լուսանկարների ցուցահանդես է անցկացվելու։ Ներկայացվելու են հայ և թուրք լուսանկարիչների՝ Զավեն Խաչիկյանի և Մեսութ Թուֆանի աշխատանքները՝ Կարսում, Գյումրիում և Անիում 2012 և 2013 թվականներին արված լուսանկարները։
Մեկ օր անց տեղի է ունենալու խորհրդաժողովը, որի ժամանակ, մասնավորապես, քննարկվելու է հայ-թուրքական սահմանին վերջին 30 տարվա քաղաքական, տնտեսական և մշակութային կյանքը։
Հավելենք, որ հանրային քննարկմանը մասնակցելու են Պոլսի հայկական «Ժամանակ» օրաթերթի գլխավոր խմբագիր Արա Քոչունյանը, հայկական «Ակօս» շաբաթաթերթի հայերեն բաժնի խմբագիր Բագրատ Էստուկյանը, Նեշե Օզգենը (Միմար Սինան համալսարան) և Մեսութ Թուֆանը։
