Առավոտյան տված մամլո ասուլիսից անմիջապես հետո ՀՀ նախագահի թեկնածու Րաֆֆի Հովհաննիսյանն այցելել է Կոտայքի մարզի Պռոշյան գյուղ, ուր հանդիպում է ունեցել ընտրողների հետ: Կարճ ելույթի ավարտին Հովհաննիսյանը, հանձին պռոշյանցի փառապանծ ազատամարտիկ և հրամանատար Կարոտի, հարգանքի տուրք է մատուցել բոլոր զոհված ազատամարտիկների հիշատակին՝ ծաղիկներ դնելով նրանց հուշարձանին:
Հաջորդ հանդիպումը Եղվարդում է եղել: Թեկնածուն քայլել է քաղաքի փողոցներով, շփվել ընտրողների հետ, ընդունել մարդկանց զորակցությունը և լսել հորդորներն ու առաջարկները:
Այնուհետև նա մեկնել է Հրազդան, որտեղ դալիճային հանդիպումը փոխարինվել է բացօթյա հավաքով, քանի որ սկսվել է նախատեսվածից ուշ և մասնակիցների թիվը ավելին էր, քան դահլիճի տարողունակությունը: Խոսելով երկրում բարձր վարձատրվող նոր աշխատատեղերի ստեղծման մասին, Հովհաննիսյանը հատկապես կարևորեց Հրազդանի երբեմնի արդյունաբերական հզոր ներուժի վերականգնումը, ինչը պետական հոգածություն է պահանջում: «Ահագնացող արտագաղթի հիմնական պատճառներից մեկը հենց բարձիթողի այս վիճակից ածանցվող գործազրկությունն է»,- համոզմունք է հայտնել նախագահի թեկնածուն:
Իր քարոզչությունը Րաֆֆի Հովհաննիսյանն ավարտել է Աբովյանում: Հանդիպումը կայացավ քաղաքի գլխավոր դալիճներից մեկում: Լեփ-լեցուն դահլիճը բազմիցս ընդհատում էր պրն. Հովհաննիսյանի խոսքը ծափահարություններով, որ ակնհայտ հավանություն էր թեկնածուի խոսքին: Հանդիպումն ավարտվել է Հովհաննիսյանի կոչով. «Մեկ անգամ մեզ պահենք սեփական հայրենիքի իսկական տիրոջ պես» և «Հայաստան» բացականչություններով:
