Ուկրաինային առաջարկվում է կա՛մ դառնալ Մաքսային միության անդամ, կա՛մ ընդհանրապես չմասնակցել համագործակցությանը: Այս մասին հայտարարել է Ուկրաինայի արտաքին գործերի նախարար Լեոնիդ Կոժարան` հավելելով, որ Կիևը հույս ունի վիճարկել Ռուսաստանի կտրուկ դիրքորոշումը:
Նախարարը նշել է, որ Ռուսաստանին իրենք առաջարկել են «երեք+մեկ» ձևաչափը, այսինքն Մաքսային միության երեք անդամ երկրները (Ռուսաստան, Բելառուս, Ղազախստան) գումարած Ուկրաինան, ստորագրում են միայն այն փաստաթղթերը, որոնք չեն հակասի երկրի` ԵՄ նկատմամբ պարտավորություններին: Սակայն Մաքսային միության անդամ երկրների դիրքորոշումը հետևյալն է. կա՛մ ստորագրում են ամեն ինչ, կա՛մ ոչինչ:
Կոժարան նշել է, որ Ռուսաստանն ու Ուկրաինան կապված են փոխշահավետ առևտրային գործընկերությամբ. «Ուստի, հույս ունեմ, որ Մաքսային միության հետ համագործակցության հարցում վերջնական արդյունքում կհասնենք փոխըմբռնման»։
Նոյեմբերին Վիլնյուսում կայանալու է «Արևելյան գործընկերության» գագաթաժողովը: Ուկրաինա-ԵՄ գագաթաժողովը կանցկացվի փետրվարի 25-ին՝ Բրյուսելում:
2012 թ. դեկտեմբերի 5-ին Աշգաբադում ԱՊՀ գագաթաժողովի շրջանակներում Ուկրաինայի և Ռուսաստանի նախագահների հանդիպումից հետո նախագահ Յանուկովիչը հայտարարել էր, որ Ուկրաինան պետք է միանա Մաքսային միության որոշ դրույթների: Նա նշել էր, որ Մաքսային միության շրջանակներում ընդունվելիք ավելի քան 30 նոր դրույթներ անմիջականորեն վերաբերում են Ուկրաինային և նրա ապրանքներին: Ուկրաինայի նախագահն ասել էր, թե գիտակցում է, որ եթե Մաքսային միության հետ համագործակցության մեխանիզմներ չգտնեն, ապա շատ բան կկորցնեն, և որ դա անթույլատրելի է Ուկրաինայի տնտեսության համար:
