Թուրքական Cihan լրատվական գործակալության հաղորդմամբ, վերջին օրերին Թուրքիայի արտաքին գործերի նախարար Ահմեդ Դավութօղլուն տարածաշրջանային կայունության ուղիների որոնման շուրջ մի շարք հանդիպումներ է անցկացրել Բահրեյնում, Կատարում և Սիրիայում:
Սիրիայի մայրաքաղաք Դամասկոսում նա հանդիպում էր ունեցել նաև ՀԱՄԱՍ-ի առաջնորդ Հալիդ Մեշալի հետ: Երեկ էլ Դավութօղլուն հեռախոսազրույց է ունեցել ՄԱԿ-ի Գլխավոր քարտուղարի` Լիբիայում հատուկ ներկայացուցիչ Աբդելիլահ Էլ Հաթիփի հետ և քննարկել լիբիական վերջին զարգացումները:
Աշխարհի դիվանագիտական շրջանակները Դավութօղլուին տվել են «բոլորի հետ լեզու գտնել կարողացող մարդ» անվանումը:
Հիշեցնենք, որ նախորդ տարի Դավութօղլուն հարցազրույց էր տվել ամերիկյան հեղինակավոր Foreign Policy պարբերականին, որը նրան ընդգրկել էր աշխարհի 100 մտածողների թվում: Ամերիկյան պարբերականի լրագրող Բլեյք Հունշելին այդ հարցազրույցի մասին հոդվածը վերնագրել էր «Պարոն Զրո խնդիրը»:
Հարցազրույցի ժամանակ Դավութօղլուն նշել էր. «Երբ 2003 թվականին ես` որպես վարչապետ Էրդողանի գլխավոր խորհրդատու, առաջ քաշեցի «զրո խնդիր հարևանների հետ» քաղաքականությունը, շատերը դա տիպիկ ուտոպիա էին համարում: Սակայն վերջին 8 տարիները հօդս ցնդեցրին այդ մտքերը: Այսօր դա իրականություն է: Ոչ ոք ճգնաժամ չի ակնկալում Թուրքիայի և նրա հարևան երկրներից մեկնումեկի միջև: Խաղաղության հասնելու համար պետք է ստեղծագործ լինել»:
Դավութօղլուն նաև նշել էր, որ իրեն դուր է գալիս Ուինսթոն Չերչիլի հետևյալ արտահայտությունը. «Դա վերջը չէ, սկիզբն էլ չէ: Դա սկզբի վերջն է», սակայն նրա քաղաքական հայացքների վրա մեծապես ազդել է Մահաթմա Գանդին, որը իր քաղաքական նպատակներին հասնելու համար կիրառել է ոչ ավանդական մեթոդներ:
Պետք է նշել, որ, ամենայն հավանականությամբ, Դավութօղլուն «զրո խնդիր հարևանների հետ» գաղափարն առաջ քաշելիս ամենաշատը ներշնչվել է Մեծ Բրիտանիայից Հնդկաստանի անկախության շարժման գաղափարակիր ու ղեկավար հանդիսացած Մահաթմա Գանդիի արտահայտած հետևյալ թևավոր խոսքից.
«Սկզբում նրանք քեզ չեն նկատում, հետո ծիծաղում են քեզ վրա, ապա պայքարում են քո դեմ, իսկ վերջում դու հաղթում ես նրանց»:
Չպետք է մոռանալ նաև Գանդիի այն խրատը, ըստ որի` եթե դու ցանկանում ես, որ ապագայում փոփոխություն լինի, ապա այժմ դու ինքդ պետք է դառնաս այդ փոփոխությունը:
