Կան մի ամբողջ շարք պատճառներ, որոնք Ուկրաինան անխուսափելիորեն տանում են տնտեսական փլուզման՝ հայտնում է CNN-ը:
Ուկրաինայի կենտրոնական բանկը հիմնական տոկոսադրույքը 19,5%-ից բարձրացրել է մինչև 30%, գրիվնան ընդամենը 1 տարում դոլարի համեմատ կորցրել է իր արժեքի մոտ 70%-ը, իսկ Ուկրաինայի ՀՆԱ-ն միայն 2014թ. նվազել է 7%-ով: Բացի դրանից՝ երկրի տնտեսությանը հսկայական վնաս է հասցնում արևելքում շարունակվող պատերազմը: Ուկրաինական տնտեսության աճին մի շարք գործոններ են խոչընդոտում, ասվում է հոդվածում:
Առաջին հերթին դա կոռուպցիայի բարձր մակարդակն է, որը հյուծում է երկրի տնտեսությունը, «ավելի ճիշտ՝ այն, ինչ դրանից մնացել է», գրում է պարբերականը: Transparency International-ի ամենակոռումպացված երկրների վարկանիշային ցուցակի համաձայն՝ Ուկրաինան կոռումպացվածության մակարդակով 175-րդ հորիզոնականից հասել է 142-րդ:
Մեջբերելով Ուկրաինայի վարչապետ Արսենի Յացենյուկի խոսքը՝ CNN-ը գրում է, որ Ուկրաինայի կառավարությունը տարեկան մոտ 10 մլրդ դոլար է կորցնում կաշառատվության պատճառով:
Ուկրաինայի երկրորդ սուր խնդիրը քաղաքական մեծ ռիսկն է: Հոդվածում նշվում է, որ եթե Ուկրաինան որպես վարկերի ստացման պայման իրականացնի ԱՄՀ-ի նախատեսած ոչ ժողովրդական բարեփոխումները, Ուկրաինայի տնտեսությունը կհաղթհարի ճգնաժամը, սակայն բնակչության տրամադրությունները և նրա դիմադրությունը ոչ ժողովրդական բարեփոխումներին կարող են կառավարությանը ստիպել հետ կանգնել այդ կուրսից:
Ուկրաինայի տնտեսության երրորդ թույլ կողմը բանկերն են: Պարբերականը գրում է, որ դա Ուկրաինայի տնտեսության ամենաթույլ օղակներից մեկն է: Ավելի քան 40 բանկ սնանկ է հայտարարվել, իսկ հիմնական տոկոսադրույքը գերազանցել է վերջին 15 տարվա առավելագույնը:
Ուկրաինայի տնտեսությունում չորրորդ բացը երկրի արդյունաբերական ներուժի քանդված առանցքն է, որը պատերազմական վիճակում գտնվող Դոնբասում է:
Ծանր արդյունաբերության գործնականում բոլոր ձեռնարկությունները դադարել են գործել: Իսկ դրանք կազմում են երկրի էներգետիկ ներուժի առյուծի բաժինը: Արդյունաբերական արտադրության մակարդակը միայն անցած տարում ընկել է 10%-ով պատերազմի և ածխի հանքերի փակվելու պատճառով, ինչի հետևանքով դադարեցվել է մնացած ձեռնարկություններին հումքի մատակարարումը:
Սպասվում է, որ ՀՆԱ-ն 2015թ. կնվազի ևս 5%-ով, ասվում է հոդվածում:
«Տնտեսության բարդ վիճակն Ուկրաինայում այսօրվա հակամարտության ինչպես պատճառն է, այնպես էլ՝ հետևանքը: Կիևում բողոքներին նախորդած հինգ ամսվա ռեցեսիան, ի վերջո՝ 2013թ. նոյեմբերին հանգեցրեց քաղաքացիական պատերազմի»,- եզրափակում է պարբերականը:
Պատրաստեց՝ Սոնա Ավագյանը
