«Ընդդիմությունը սոցիալ-տնտեսական խնդիրներին փորձում է քաղաքական բնույթ տալ, ինչը չի հաջողվի,- այսօր հրավիրված մամուլի ասուլիսի ընթացքում ասաց ԱԺ ՀՀԿ խմբակցության պատգամավոր Գագիկ Մելիքյանը:- Ամեն հանրահավաքից հետո նույն դեմքերը նույն խնդիրներն են առաջարկում, հետևաբար նրանց որդեգրած քաղաքականության արդյունքում հանրահավաքը կմարի՝ եթե այսպես շարունակվի: Ես կցանկանայի, որ լուրջ ընդդիմություն ունենայինք, որը իշխանության հետ լուրջ մրցակցության մտներ, բայց, ցավոք, չեմ տեսնում»:
Իսկ երբ խոսք եղավ արտահերթ ընտրությունների մասին, պատգամավորը հիշեց հայտնի անեկդոտը, ապա ասաց. «Երբ մեկը հայտարարում է արտահերթ ընտրությունների մասին, մյուսները շտապում են կրկնել նրան։ Հետևաբար, Հայաստանում կլինեն ոչ թե արտահերթ, այլ հերթական ընտրություններ»:
Խոսելով ընդդիմության այսօրվա հանրահավաքի մասին՝ Գագիկ Մելիքյանը ասաց, թե այս հանրահավաքին կլինեն քիչ մարդիկ, և այն շրջադարձային չի լինի: Ինչ վերաբերում է խոսակցություններին, թե 200 հազար քաղաքացի կհավաքվի, և կմտնեն Ազատության հրապարակ, Մելիքյանը այդ առնչությամբ ասաց. «Արդյոք դուք հավատո՞ւմ եք, որ 200 հազար մարդ կհավաքվի, և իշխանությունը կհեռանա, դա ուղղակի ժողովրդին հավաքելու միջոց է: Կամ ի՞նչ է նշանակում Ազատության հրապարակը գրավել, ծանր մարտական գործողություններ հաղթահարելու տպավորություն է ստեղծվում: Ոչ ոք Ազատության հրապարակը զենքով չի պաշտպանում, ոչ ոք ընդդիմությանը չի խոչընդոտում մտնել Ազատության հրապարակ և այնտեղ ժամանց անցկացնել, այնտեղ չկան փշալարեր, ականապատ տարածք, ծանր հրետանի չկա դրված, որ ընդդիմությունը գրավի և դա համարի մեծ հաղթանակ»:
