Վաղը նշանակված ԲՀԿ համագումարը կարող է վերջինը լինել այս կուսակցության համար, քանի որ ԲՀԿ 30-հոգանոց խմբակցության առնվազն կեսը կարող է լքել կուսակցությունը: Բազմաթիվ ԲՀԿ-ականները սպասում են Ծառուկյանի հայտարարությանը, որից հետո նրանք կհամարեն, որ այլևս որևէ պարտավորություն չունեն Ծառուկյանի նկատմամբ, և հանգիստ կարող են հայտարարել ԲՀԿ-ից դուրս գալու մասին:
Փետրվարի 13-ից սկսած ԲՀԿ խմբակցությունը, որն իր մեծությամբ երկրորդն էր խորհրդարանում, էականորեն փոքրացել է: ԲՀԿ խմբակցությունը լքելու մասին հայտարարել են մեծամասնական ընտրակարգով ընտրված Մուշեղ Պետոյանը, Դավիթ Քոչարյանն ու Գրիգորի Մարգարյանը: «Բարգավաճ Հայաստան» կուսակցությունից դուրս գալու մասին են հայտարարել Հարություն Ղարագյոզյանը, Արագած Ախոյանը, Կարո Կարապետյանը, Ռուստամ Գասպարյանը, որոնք չեն կարող դուրս գալ ԲՀԿ խմբակցությունից, քանի որ կկորցնեն պատգամավորական մանդատը: Չհերքված տեղեկություններ են տարածվել, որ ԲՀԿ-ն կլքեն նաև Մարտուն Գրիգորյանը, Աբրահամ Մանուկյանը, Վարդան Օսկանյանը: Այսօր արդեն տեղեկություններ կան ԲՀԿ-ն լքելու մտադրություն ունեցող նոր անձանց մասին: Հեռացողների օրինակին կարող են հետևել պատգամավորներ Արմեն Ավետիսյանը, Արշակ Մխիթարյանը, Բազմասեր Առաքելյանը, Արայիկ Աղաբաբյանը, Հրանտ Դավթյանը, Արա Արամյանը:
Սա ԲՀԿ-ն լքողների ամբողջական ցուցակը չէ, և վաղը հայտնի կլինեն նաև այլ անուններ: Հնարավոր է, որ կուսակցությունը լքեն մարդիկ, ովքեր դատապարտում էին առաջին դուրս եկողներին՝ հայտարարելով, որ կուսակցությանը նման դժվարին պահին չի կարելի դավաճանել: Այդպիսի դասական օրինակ կարող է լինել Վահան Բաբայանը, որը, մեկնաբանելով ԲՀԿ-ն առաջինը լքած Արագած Ախոյանի քայլը, հայտարարում էր՝ չի կարելի դժվարին իրավիճակում լքել կուսակցությունը: Արդյոք հիմա ԲՀԿ-ի համար ավելի լա՞վ վիճակ է, քան փետրվարի կեսերին: Դժվար թե:
Որքան էլ տարօրինակ հնչի, ԲՀԿ-ն քայքայում են ոչ թե իշխանությունները, որոնց համար այլևս միևնույն է, թե քանի մարդ կմնա ԲՀԿ կուսակցությունում, որովհետև որևէ ԲՀԿ-ական այլևս չի արտասանելու հրաժարական, պաշտոնանկություն կամ արտահերթ ընտրություն բառերը, այլ իրենք՝ ԲՀԿ-ականները: Խմբակցության այն անդամները, ովքեր արդեն լքել են ԲՀԿ-ն կամ նման որոշում ունեն, ակտիվ քարոզչություն են ծավալում չկողմնորոշվածների և տատանվողների շրջանում: Նրանց տրամաբանությամբ՝ որքան շատ մարդ լքի ԲՀԿ-ն, այնքան ավելի հեշտ կլինի արդարացնել իրենց պահվածքը, այնքան իրենց փախուստը սեփական կուսակցությունից ավելի հերոսական կլինի:
Իսկ ինչու են ԲՀԿ-ականները որոշել կուսակցությունից դուրս գալ հենց համագումարի օրը և ոչ թե դրանից առաջ: ԲՀԿ-ականները պայմանավորվել են, որ իրենք պետք է իրենց ճիշտ պահեն և սպասեն, որ առաջին քայլն անի Ծառուկյանը: Երբ Ծառուկյանը կուսակցության համագումարում կհայտարարի ԲՀԿ ղեկավարի պաշտոնը թողնելու իր մտադրության մասին, իրենք էլ կհայտարարեն, որ ԲՀԿ են եկել հանուն Ծառուկյանի, և եթե Ծառուկյանը հեռանում է, իրենց ԲՀԿ-ում պահող որևէ բան այլևս չկա: Հենց այս տեսակետի կրողներ են Աբրահամ Մանուկյանը, Մարտուն Գրիգորյանը և այլ ԲՀԿ-ականներ, որոնք համարում են, որ Ծառուկյանի հետ իրենք ապագայում կարող են ունենալ այլ բիզնես շահեր և նույնիսկ ԲՀԿ-ից դուրս գալու դեպքում անգամ իմաստ չունի փչացնել հարաբերությունները նրա հետ:
Եթե ԲՀԿ-ից դուրս եկողների ձնագունդը իսկապես գլորվի, ապա 36-հոգանոց խմբակցությունից լավագույն դեպքում կարող է մնալ 10 պատգամավոր: Քաղաքական դաշտի հսկան կլրացնի գաճաճ կուսակցությունների ցանկը՝ ունենալով սահմանափակ հնարավորություններ ու սահմանափակ ամբիցիաներ:
