Թուրքական «Զաման» թերթի սյունակագիր Մեհմեթ Ֆաթիհ Օզթարսուն, որը ժամանակին ապրել և հայերեն է սովորել Հայաստանում, իր՝ «Հայաստանի՝ օլիգարխներով լի գլուխը դարդի մեջ է» հոդվածում անդրադարձել է ՀՀ նախագահ Սերժ Սարգսյանի՝ հայ-թուրքական արձանագրությունները ՀՀ Ազգային ժողովից հետ կանչելու թեմային, ինչպես նաև վերջինիս՝ ԲՀԿ առաջնորդ Գագիկ Ծառուկյանի հետ հակամարտությանը։
Հեղինակը նշում է, որ Սարգսյանի կողմից արձանագրությունները հետ կանչելն ամեևին էլ անակնկալ չէր։
«Հայաստանի նախագահը 2009 թվականին ստորագրված արձանագրությունների ձախողման համար ողջ պատասխանատվությունը գցեց Թուրքիայի վրա՝ հայտարարելով, որ իրենց համար այս ձևաչափն այլևս ընդունելի չէ, քանի որ թուրքական կողմը քաղաքական կամք չի ցուցաբերել այս հարցում»,- գրում է Օզթարսուն։
Սյունակագիրը անդրադարձել է նաև փետրվարին Հայաստանի ներքաղաքական դաշտում տեղի ունեցած սրացումներին։
«Բարգավաճ Հայաստան» կուսակցության առաջնորդ Գագիկ Ծառուկյանի (հեղինակը տառացի գրում է, որ Ծառուկյանը ժողովրդի շրջանում ավելի հայտնի է «Դոդի Գագո» մականվամբ, այնուհետև բացահայտում «դոդ» բառի նշանակությունը – խմբ.) և Սարգսյանի միջև սկսված պատերազմը դեռ կարող է իր ազդեցությունն ունենալ։ Ծառուկյանը օլիգարխ է և ազդեցիկ մի քաղաքական գործիչ, որը երկար ժամանակ եղել է իշխանությունների հետ մի թևում, սակայն վերջերս խիստ քննադատություն է հնչեցրել Սարգսյանի գլխավորած իշխանության հասցեին, իսկ վերջինիս պատասխանը չի ուշացել»,- նշել է հեղինակն ու հանգամանալից կերպով ներկայացրել իրադարձությունների զարգացման հետագա ընթացքը։
Վերջում Օզթարսուն կարծիք է հայտնում, որ սույն համատեքստում մեծ է նաև ՀՀ 2-րդ նախագահ Ռոբերտ Քոչարյանի դերակատարումը, որը ևս հասցրել է արձագանքել վերոնշյալ զարգացումներին և իր անհանգստությունը հայտնել այդ կապակցությամբ։
