Բելառուսի նախագահ Ալեքսանդր Լուկաշենկոն կարծում է, որ գլխավորը հինգշաբթի օրը Մինսկում «նորմանդական քառյակի» նիստում ձեռք բերված պայմանավորվածություններն իրագործելն է: Այս մասին հայտնում է TASS-ը:
«Պատմության մեջ շատ փաստաթղթեր են ծնվել, հիմա գլխավորն այդ փաստաթղթերն իրագործելն է»,- ասել է նա լրագրողներին անցած բանակցությունների արդյունքներով: Նրա խոսքով՝ «այդ գործընթացը շատ ավելի բարդ է, քան ստեղծելը. այստեղ օրերը չեն բավականացնի»:
Լուկաշենկոն Անկախության պալատում եղած բարձրաստիճան հյուրերի մասին մի քանի մանրամասն է պատմել: «Դուք ամեն ինչ տեսաք, թե ինչպես էր ամեն ինչ կազմակերպված: Կերակրել ենք այն ամենով, ինչ արտադրվում են Բելառուսում և Ռուսաստանում: Կերել են ձվածեղ, պանիր, կաթնամթերք, մի քանի դույլ սուրճ են խմել»,- ասել է Լուկաշենկոն:
Նա նաև պատմել է, որ անցած ամբողջ գիշեր տևած բանակցությունների ընթացքում պատվիրակությունների փորձագետները հերթափոխով են քնել, իսկ պետությունների ղեկավարները, իհարկե, չեն քնել: «Ամեն ինչ նորմալ է, տրամադրությունն ապահովել են»,- ասել է Լուկաշենկոն:
Բելառուսի նախագահը նշել է, որ «շատ գոհ» է Մինսկի բանակցությունների արդյունքներից:
«Պարզապես կեցցեն նրանք («նորմանդական քառյակի» պետությունների առաջնորդները), դիմացան մարաթոնին»,- ասել է Լուկաշենկոն:
Նրա խոսքով՝ «Պատերազմի և խաղաղության հարցերն ամիսներով և տարիներով են լուծվում, իսկ այստեղ հաջողվեց 15 ժամում պայմանավորվել կրակի դադարեցման մասին»: «Բայց գլխավորն առջևում է, ինչպես կլինի՝ կտեսնենք»,- ասել է Լուկաշենկոն:
Նա խոստովանել է, որ անցած գիշեր, երբ ընթացել են «քառյակի» բանակցությունները, իրեն չի հաջողվել քնել: «Ես ինչպե՞ս կարող եմ քնել, չէ՞ որ իմ առաջադրանքը «ռազմամթերք» մատուցելն էր»,- կատակել է Լուկաշենկոն:
