Թուրքիայի Ստամբուլ քաղաքում առաջադիմական հայացքներ ունեցող մի խումբ երիտասարդներ փորձում են պայքարել այլատյացության դրսևորումների, այդ թվում՝ հակահայ կարգախոսների դեմ: Այս մասին հայտնում է «Օրթակ հաբեր» լրատվական կայքը:
Քաղաքի Քադըքյոյ թաղամասում ֆաշիստական խմբավորումները փետրվարի 22-ին Խոջալուի դեպքերի տարելիցի կապակցությամբ «հայկական ահաբեկչության» դեմ ցույց են նախաձեռնել: Դրան ընդառաջ՝ թաղամասում ռասիստական բովանդակության գրություններ են հայտնվել: «Կա՛մ թուրք եք, կա՛մ փչացած» կարգախոսով առաջնորդվող ծայրահեղականները քարոզչություն են իրականացնում անգամ տեղի հայկական եկեղեցիների առջև:
Ի պատասխան դրան՝ հասարակական-քաղաքական կառույցների մի խումբ ակտիվիստներ թաղամասում մի արշավ են սկսել, որն անցնում է «Քադըքյոյում ռասիզմի համար տեղ չկա» կարգախոսի ներքո: Տեղեկատվական թերթիկներ բաժանելուց և պաստառներ փակցնելուց բացի, նրանք նաև պահանջում են արգելել հակահայ ցույցի անցկացումը:
Նախատեսվում է, որ ֆաշիզմի և ռասիզմի դեմ պայքարող երիտասարդները քրիստոնեական եկեղեցիների առջև բողոքի գործողություն կանցկացնեն նաև հաջորդ շաբաթվա վերջին:
Հավելենք, որ Ստամբուլի Քադըքյոյ (Քաղկեդոն) թաղամասում ավանդաբար զգալի թվով հայեր են բնակվել: Այստեղ են Պոլսի հայկական համայնքին պատկանող Սուրբ Թագավոր եկեղեցին և Արամյան-Ունջույան տարրական դպրոցը:
Նշենք, որ Թուրքիան ակտիվորեն օգտագործում է «Խոջալուի դեպքերը»՝ իր հակահայ քարոզչության համար: Պաշտոնական Անկարան Խոջալուի դեպքերի համար հայերին մեղադրում է «ադրբեջանցիների կոտորածի ու ցեղասպանության» համար և իր պնդումներն ակտիվորեն թմբկահարում միջազգային հարթակում:
Յուրաքանչյուր տարվա փետրվար ամսին թուրքական իշխանությունները երկրի ողջ տարածքում ակտիվացնում են Խոջալուի դեպքերի հետ կապված գործունեությունը, ինչն ուղեկցվում է խիստ հայատյաց տրամադրություններով: Միևնույն ժամանակ, թուրքական պետության հետ մեկտեղ՝ ադրբեջանական լոբբին ևս ակտիվորեն կազմակերպում է տարատեսակ միջոցառումներ, քարոզչական արշավներ՝ Թուրքիայում հակահայ կրքեր բորբոքելու համար:
