Վրաստանի նախագահի աշխատակազմը պատասխանել է Վրաստանում Հայ առաքելական եկեղեցու հայտարարությանը, որն անդրադարձել էր Վրաստանի նախագահ Միխեիլ Սաակաշվիլիի և «Միասնական ազգային շարժում» կուսակցության ներկայացուցիչների հայտարարությանն ազգությամբ հայ ակտիվիստ Վահագն Չախալյանի ազատարձակման կապակցությամբ:
Ինչպես հաղորդում է Regnum-ը, նախագահի աշխատակազմի հայտարարությունում հարգանք է մատուցվում ազգությամբ հայ քաղաքացիներին և հայկական թեմին և ընդգծվում է, որ նախագահի և նրա քաղաքական թիմի հայացնքերը հիմնված են երկրի բազմազգ միասնականության սկզբունքի վրա և յուրաքանչյուր ֆոբիա, այդ թվում՝ հայաֆոբիան, նրանց համար անընդունելի է:
Հայտարարության մեջ նշվում է, որ Սաակաշվիլին ընդգծել է, թե Չախալյանի էթնիկ ծագումը որևէ նշանակություն չունի, խոսքը Վրաստանի քաղաքացու հանցավոր գործողությունների մասին է: Բացի այդ, Վրաստանի նախագահը բազմիցս արտահայտել է իր բացասական վերաբերմունքը համաներման հանդեպ և մասնավորապես ռուս լրտեսների ազատ արձակման կապակցությամբ, որոնց մեծ մասը էթնիկ վրացիներ են:
«Վրաստանի նախագահը ոչ մեկ անգամ է նշել այն օրինակելի նվիրվածությունը, որ ցուցաբերել են ազգությամբ հայ քաղաքացիները երկրի անկախության և ազատության համար պայքարում, նոր Վրաստանի կառուցման գործում»,- ասվում է հայտարարությունում:
Նախագահի նման դիրքորոշման ֆոնին Վրաստանում Հայ առաքելական եկեղեցու հայտարարությունը և դիրքորոշումը Չախալյանի ազատարձակման հարցում առաջացնում է Սաակաշվիլիի աշխատակազմի զարմանքը:
Նախագահի աշխատակազմը Հայ առաքելական եկեղեցու հայտարարությունը գնահատում է որպես քաղաքականացված և հույս հայտնում, որ այդ թյուրիմացության պատճառը եղել է թիմի ղեկավարության տեղեկացված չլինելը:
