ԱՄՆ Տեխաս նահանգում տարրական դպրոցի աշակերտը պարապմունքներից հեռացվել է հոբբիթ Բիլբո Բեգինսի կախարդական հնարքը կրկնելու երևակայական փորձի համար: Բիլբոն «Մատանիների տիրակալը» ֆիլմերի գլխավոր հերոսներից մեկն է՝ նկարահանված Ջոն Տոլկիենի համանուն վեպի հիման վրա:
9-ամյա Էյդեն Ստյուարդն իր համադասարանցու հետ խաղալիս նրան ասել է, որ կարող է իր կախարդական մատանու օգնությամբ այնպես անել, որ նա անհետանա, ինչպես դա անում էր հոբբիթ Բեգինսը՝ հայտնում է TASS-ը:
Հայտնի չէ, թե այդ սովորական մանկական երևակայությունն ինչպես է հասել դպրոցի ղեկավարությանը, բայց այնտեղ համարել են, որ Ստյուարդը մոգական հնարքի մասին հայտարարելով՝ սպառնացել է մեկ այլ դպրոցականի անվտանգությանը: Որպես հետևանք՝ տղային մի քանի օր հեռացրել են դպրոցից:
Այս մասին հայտնել է դպրոցականի վրդովված հայրը, որը տեղի լրագրողներին պատմել է դպրոցի ղեկավարությունից իր ստացած հեռախոսազանգի մասին: Այդ դպրոցի տնօրենն ու դպրոցի շրջանային գլխավոր հովանավորը հրաժարվել են մեկնաբանությունից:
Համադասարանցու համար պոտենցիալ «վտանգ» ստեղծողն ասել է. «Քանի որ «Մատանիների տիրակալի» Բիլբո Բեգինսը կարողանում էր մատանու օգնությամբ այնպես անել, որ մարդիկ անհետանային, ես պատկերացրի, որ կարող եմ նույնն անել, որպեսզի տղան անհետանա: Բայց ես իմ մատանին չեմ պտտել նրա շուրջը»:
