Օրեր առաջ մի քանի ոստիկաններ այցելել են ՀԺԿ նախկին համակիր, այժմ Բելգիայում քաղաքական ապաստան ստացած Գրիշա Վիրաբյանի՝ Արարատի մարզի Շահումյան գյուղի տուն և հետաքրքրվել նրանով: Այս մասին «Առաջին լրատվական»-ի հետ զրույցում ասաց Բելգիայում գտնվող Գրիշա Վիրաբյանը: Նրա պատմելով՝ ոստիկանները գնացել են գյուղ, գյուղապետից, գյուղացիներից հարցրել իր տան տեղը:
Վիրաբյանի խոսքերով՝ նրա գյուղական տանը, սակայն, վաղուց ոչ ոք չի բնակվում, իսկ ոստիկանները շատ լավ գիտեն իր գտնվելու վայրը: «Եվ հետո, ես միշտ էլ կապի մեջ եմ իմ գործով քննիչի հետ ու իմ փաստաբանների: Միայն ինձ համար անհասկանալի է, թե հիմա ինչ է եղել, ինչու են ինձ փնտրում, ինչ եմ գողացել կամ ում եմ սպանել Հայաստանում»,-ասաց Վիրաբյանը՝ հավելելով, որ իրենով հետաքրքրված ոստիկաններին հարևաններն են դիմավորել, կոպտել ու ճանապարհել:
Ոստիկանությունից, սակայն, հերքեցին, թե նման բան է եղել: Լրատվության և հասարակայնության հետ կապերի վարչության պետ Աշոտ Ահարոնյանը մեզ հետ զրույւցում ասաց, որ նման բան չի եղել, ինքը հետաքրքրվել է թե́ ոստիկանության Արարատի բաժնից, թե́ տեղում և պարզել, որ Վիրաբյանով ոչ ոք չի հետաքրքրվել: «Առավել ևս, որ բոլորը գիտեն, թե նա որտեղ է, ինչ իմաստ կա որոնելու այդ անձին»,- ասաց Ահարոնյանը:
Մինչդեռ Վիրաբյանը պնդում է, որ իր հարևանները չէին կարող սխալվել:
