1950թ. այս օրը ծնվեց տաղանդաշատ արձակագիր, դրամատուրգ, թարգմանիչ Գուրգեն Խանջյանը:
Ավարտել է Հայկական գյուղատնտեսական ինստիտուտը: 2006-ից ՀԳՄ «Գրեթերթ» պարբերականի խմբագիրն է: Հեղինակ է ավելի քան 10 գրքի, բազմաթիվ պիեսների և սցենարների, թարգմանություններ է կատարում ռուսերենից:
Խանջյանի ստեղծագործությունները թարգմանվել են ռուսերեն, անգլերեն, պարսկերեն, վրացերեն, արժանացել է պետական մրցանակի (1999), Հայաստանի գրողների միության մրցանակների` արձակի և թատերագրության համար, «Նարցիս» գրական ամսագրի մրցանակի, Թեքեյան մրցանակի:
Գրել է «Շարժասանդուղք» (1994), «Ստվերներ խամաճիկների փողոցում» (1998), «Սպանել փրկչին» ժողովածուները, «Հիվանդանոց» (1994), «Ենոքի աչքը» վեպերը (2012) և այլ ստեղծագործություններ:
Պիեսները բեմադրվել են Երևանի Հրաչյա Ղափլանյանի անվան դրամատիկական և Հակոբ Պարոնյանի անվան կոմեդիայի թատրոններում, Թբիլիսիի, Վանաձորի, Ստեփանակերտի, Լոս Անջելեսի, Հալեպի թատրոններում, հեռուստատեսությամբ, ռադիոյով: Նրա սցենարներով նկարահանվել են ֆիլմեր և հեռուստատեսային մանրապատումներ (Վիգեն Չալդրանյանի «Լռության սիմֆոնիան», «Մաեստրո»):
