«Ես բազմիցս նշել եմ, որ մինչև պետական պաշտոնյա լինելը բիզնեսներ եմ ունեցել, որոնք բավականին արդյունավետ աշխատել են, և կան որոշակի շենք-շինություններ, որոնք վարձակալությամբ հանձնված են տարբեր տնտեսվարողների»,- այսօր լրագրողների հետ հանդիպման ժամանակ ասաց Հայաստանի գլխավոր հարկադիր կատարող Միհրան Պողոսյանը՝ պատասխանելով հարցին, թե ինչպես լուծվեց «Սթարի» սեփականատիրջ հետ դատական վեճը, որից Պողոսյանը 5 միլիոն դոլար էր պահանջում:
«Պարզապես եղել է պայմանագիր, որով սահմանված պարտավորությունները չէին կատարվել, և ես՝ որպես քաղաքացի, դիմեցի դատարան: Բայց այդ հարցի շուրջ մենք որոշակի համաձայնության եկանք, և հարցը ինչ-որ կերպ լուծվեց»,- հավելեց Պողոսյանը:
Վերջինս ևս մեկ անգամ հայտարարեց, որ ինքը ներկա պահին բիզնեսներ չունի, իր կինն ու երեխաները՝ ևս, սակայն բարեկամների որոշակի շրջանակ կա, որոնք բիզնեսներ ունեն, բայց «չգիտես ինչու նրանց բիզնեսները փորձ է արվում կապել իր անվան հետ»:
«Առաջին լրատվական»-ի հարցին, թե մի՞թե իրեն չեն պատկանում «Ֆրեշ» սուպերմարկետների ցանցն ու Ծաղկաձորի «Կեչառիս» հյուրանոցը, Պողոսյանը պատասխանեց. «Ֆրեշն ու «Կեչառիս» հյուրանոցն իմը չեն: «Ֆրեշի» գույքն է իմը, որը տրված է վարձակալությամբ, իսկ «Կեչառիս» հյուրանոցի հետ ես ընդհանրապես կապ չունեմ: Կապ ունի որոշակի բարեկամ, որը չասեմ ով է, թե չէ իմ բոլոր բարեկամները կբացվեն»:
