Թուրքական Miliyet թերթի փոխանցմամբ, ԵԱՀԿ-ն մտահոգություն է հայտնել ներկայիս դրությամբ թուրքական բանտերում 57 լրագրողների գտնվելու կապակցությամբ:
Այս մասին հայտարարել է ԵԱՀԿ մամուլի ազատության հարցերով հատուկ ներկայացուցիչ Դունյա Միյատովիչը: Վերջինս նամակ է ուղարկել Թուրքիայի արտգործնախարար Ահմեդ Դավութօղլուին, որում նշել է, որ ներկայումս թուրքական բանտերում են գտնվում 57 լրագրողներ, սակայն եթե հաշվի առնվեն թուրք լրագրողների նկատմամբ ընթացքի մեջ գտնվող դատավարությունները, ապա այդ ցուցանիշը կարող է հասնել 700-1000-ի:
Հիշեցնենք, որ 2010թ. հոկտեմբերի 20-ին «Լրագրողներ առանց սահմանների» (RSF) կազմակերպության հրապարակած զեկույցում Թուրքիայում խոսքի և մամուլի ազատության մակարդակը որակվել էր որպես աղետալի. խոսքի ազատության ցուցանիշով Թուրքիան աշխարհի 178 երկրների շարքում զաղեցրել էր 138-րդ տեղը:
Իսկ սեպտեմբերի վերջին Թուրքիայի նախագահ Գյուլը լրագրողի աշխատանքը որակել էր որպես շատ վտանգավոր` նշելով, որ վերջին շրջանում միայն «Զաման», «Թարաֆ», «Բուգյուն», «Ենի Շաֆաք», «Սթար» և «Վաքիթ» թերթերի դեմ անցկացվել է 3500 հետաքննություն:
