Հունվարի 24-ին, կալանավայրից ազատվել է ջավախքահայ քաղբանտարկյալ Վահագն Չախալյանը:
Վրաստանում տեղի ունեցած իշխանափոխության և 2012 թվականի դեկտեմբերին Վրաստանի խորհրդարանի կողմից ընդունված համաներման մասին օրենքի համաձայն, վերստին ազատության մեջ է հայ մեծանուն և նվիրյալ գործիչը, արդարության համար անվեհեր մարտիկը, ով 2001 թվականից նվիրվելով հասարակական կյանքին, գործել է Ջավախքում հայոց եկեղեցիների պահպանության, դպրոցներում մայրենի լեզվի դասավանդման, ջավախքահայերի իրավունքների պաշտպանության ուղղությամբ:
Հարազատների և ընկերների ուղեկցությամբ, ովքեր գտնվում էին ք. Ռուսթավի թիվ 1 կալանավայրի բակում, քաղբանտարկյալը ուղևորվել է Թբիլիսիի Հավլաբարի Սուրբ Էջմիածին եկեղեցի, որտեղ նրան դիմավորեցին Վիրահայոց Թեմի Առաջնորդ Գերաշնորհ Տեր Վազգեն եպիսկոպոս Միրզախանյանը՝ հոգևոր դասի և պաշտոնեության, վիրահայ համանքի և հասարակայնության ներկայացուցիչների հետ: Վահագն Չախալյանին ջերմորեն դիմավորեցին ընդամենը 10 օր առաջ կալանավայրից ազատված հայազգի քաղբանտարկյալներ Արմեն Գևորգյանը և Ռուբեն Շեկոյանը:
Սրբազան Հայրը Թբիլիսիի Սուրբ Էջմիածին եկեղեցում, հոգևոր դասի հետ միասին աղոթք է բարձրացրել և օրհնել ազատություն վերադարձած Վահագն Չախալյանին: Թեմակալ Առաջնորդն իր խոսքում բարձր գնահատեց նոր իշխանությունների արդար և մարդասիրական դրսևորումները: Նա շնորհավորեց և իր հոգևոր խոսքով բարեմաղթեց երիտասարդին, ով ինչ-որ մարդկանց քմահաճույքով և կեղծ մեղադրանքներով 4 ու կես տարի կորցրեց ազատությունը, կտրվեց հարազատներից ու ընտանիքից, գտնվելով կալանավայրում: Բազմաթիվ անգամ կենաց և մահու օրեր ապրած Չախալյանը, սակայն ամուր մնաց՝ կռիվ տալով կյանքի և ապրելու համար, ապրելու՝ հանուն այն գաղափարների, որոնք կիսատ էին մնացել: Տեր Վազգեն եպիսկոպոս Միրզախանյանը արժևորեց այն, որ Վահագն Չախալյանի արդար գործի համար պայքարում էին ոչ միայն Ջավախքում, Վրաստանում և մայր Հայրենիքում, այլև ողջ Սփյուռքում, Չախալյանին գնահատելով որպես հոգևոր նահատակ, ով պատիժ է կրում ճշմարտության համար:
Հեռախոսով Վահագն Չախալյանին իր Հայրապետական օրհնությունն է հղել Ն.Ս.Օ.Տ.Տ. Գարեգին Բ Ամենայն Հայոց Կաթողիկոսը: Չախալյանն իր երախտագիտությունն է հայտնել Վեհափառ Հայրապետին,նրա հայրական խնամքի և ուշադրության համար:
Վահագն Չախալյանը երախտագիտության խոսքեր է ուղղել Վեհափառ Հայրապետին, Վիրահայոց Թեմի Առաջնորդին, հոգևոր դասին, կալանավայրերի հետ տարվող աշխատանքների պատասխանատու Տեր Հուսիկ քահանա Հարությունյանին և Առաջնորդի օգնական Միքայել Ավագյանին, բոլոր նվիրյալ հայորդիներին, ովքեր մշտապես այցելել են նրան կալանավայրում գտնված ժամանակահատվածում, քաջալերել են և հուսադրել: Նա նաև իր շնորհակալությունն է հայտնել Վրաստանի նոր իշխանություններին, խորհրդարանին, Մայր Հայրենիքին և միջազգային հանրության, ովքեր ջանք ու եռանդ չեն խնայել նրա ազատման գործում: «Իմ պայքարը եղել է հանուն արդարության, մեր պարտքն է մնալ մեր Եկեղեցուն հավատարիմ, մեր լեզվին և մեր ժողովրդին նվիրված և այդ գաղափարները փոխանցել մեր սերունդներին-ասել է Վահագն Չախալյանը:
Այնուհետև Վահագն Չախալյանն ուղևորվել է Վրաստանում ՀՀ դեսպանություն, որտեղ նրան հյուրընկալել է Վրաստանում ՀՀ արտակարգ և լիազոր դեսպան պարոն Հովհաննես Մանուկյանը:
