«1988 թ., երբ ստեղծվեց շարժումը, ես այստեղ չէի, ծառայում էի սովետական բանակում: Առաջին Ղարաբաղյան կոմիտեին ծանոթ չեմ: Բանակից եկա հունիսին: Եկա և ընկերներիս ասացի, որ այս ամենն ավարտվելու է գլոբալ մեծ պատերազմով Ղարաբաղի և Ադրբեջանի միջև: Ասացի, որ միությունը փլուզվելու է, հանրապետությունները դառնալու են անկախ պետություն, և ես լինելու եմ չորրորդ պրեզիդենտը: Ամեն ինչ այդպես էլ հետագայում ծավալվեց: Համապատասխան կառույցները ստուգել են` խոսելով մարդկանց հետ: Երբ ես լսարան էի մտնում, հումորով ասում էին` ոտքի, պրեզիդենտն է մտնում»,- «Կենտրոն» հեռուստաընկերության «Ուրվագիծ» հաղորդման եթերում ասել է նախագահի էպոսագետ թեկնածու Վարդան Սեդրակյանը:
Նա նշել է, որ մասնակցել է ՀՀ բոլոր համապետական ընտրություններին` երկրորդ կամ երրորդ պլանում, և ճակատագրի բերումով միշտ պարտվողի թիմում է եղել. «95-ի ԱԺ ընտրություններում Իգոր Մուրադյանի վստահված անձն էի, ով խայտառակ պարտություն կրեց, 96-ին Վազգեն Մանուկյանի կողմից էի, 98-ին եղել եմ հանձնաժողովի նախագահ, և իմ ընտրատարածքում հաղթել է Կարեն Դեմիրճյանը: Եղել եմ նաև Արամ Զավենի Սարգսյանի կողքին, քանի որ նրա կուրսեցին էի: Գաղափարական համընկնում չկար»:
Էպոսագետի խոսքերով՝ այն, ինչ կատարվում է այսօր, երեկ, 90-ականներին, կապված է «Սասնա Ծռերի» հետ: Կոնկրետ քաղաքական գործիչներն ու ծրագրերը հերոսների տեսքով են: ՀՀՇ-ն ու Լևոն Տեր-Պետրոսյանը, ըստ Վարդան Սեդրակյանի, Ձենով Օհան համակարգն է: 98-ին Ձենով Օհանից իշխանությունն անցնում է Քեռի Թորոսին` Ռոբերտ Քոչարյան, Վանո Սիրադեղյան… «Ինչ վերաբերում է 2008-ի մարտի 1-ին, երևաց, որ հանրապետությունում Քեռի Թորոսի ուժային համակարգն է, որը հարցերը լուծում է ուժային ճանապարհով»,- ասել է նախագահի թեկնածու:
«Վերևում աստված կա»-ն ոչ թե կարգախոս է, այլ հիշեցում, քանի որ մեր երեք նախագահները, ըստ էպոսագետի, տառապում են հիշողության կորստով: Ընդդիմության ճամբարում ևս կան նման մարդիկ:
Վարդան Սեդրակյանն ասել է, որ եթե դառնա նախագահ, որևէ մեկը հարկ չի մուծելու: Իսկ նոր անկախացած պետություններում, ըստ նրա, էպոսագետից նախագահ մեկ քայլ է:
