Ամերիկյան Vampire Weekend խումբը հայտարարել է իր նոր ալբոմի ձայնագրման ավարտի մասին: Այս մասին հայտնում է NME-ն:
Հունվարի 22-ին խմբի Twitter-ի էջում հայտնվել է «Երրորդ ալբոմը պատրաստ է: Մայիսի 7-ին» հաղորդագրությունը: Հետո հղում է արվել նաև Vampire Weekend կայքում:
Խմբի ներկայումս վերջին՝ Contra ալբոմը թողարկվել է 2010-ին:
«Ալբոմի ստեղծումը բարդ գործընթաց է,- NME-ին ասել է Vampire Weekend-ի առաջատար Էզրա Քենիգը:- Ամեն դեպքում, մեզ համար դա այդպես է: Երբ մենք նոր նստեցինք գրելու, արագ 2-3 երգ ստեղծագործեցինք, որոնք իդեալական համարեցինք հաջորդ ձայնագրության համար: Մի քանի ամիս դրանցով հպարտանալուց հետո հասկացանք, որ մեզ դեռ 11 կամ 12 երգ է պետք»:
«Հետո սկսվում է ընկճախտը,- ավելացրել է նա:- Ոչ ոք չի ուզում, որ ալբոմում 3 հրաշալի երգ և 10 աղբ լինի: Նշակետը գնալով ավելի է բարձրանում, ինչ-որ պահի դու դադարում ես հասկանալ՝ հետո ի՞նչ: Երրորդ ալբոմն ավելի դժվար է ստեղծվել, բայց երևի այդպես էլ պետք է լինի»:
Ալբոմը, որի անունն առայժմ չի հնչեցվել, ձայնագրվել է պրոդյուսեր Արիել Ռեխտշեյդի, Սնուփ Լայոնի, Թեոֆիլուս Լոնդոնի և այլ արվեստագետների հետ:
2012-ի նոյեմբերին Vampire Weekend-ը Ջիմմի Քիմմելի շոուի եթերում կատարել է Unbelievers թրեքի պրեմիերան: Խմբի բասիստ Քրիս Բայոն նույն թվականի մայիսի 21-ին թողարկել է իր առաջին փոքր մենաալբոմը՝ Sunburn-ը:
