ԱՄՆ պաշտպանության նախարարությունը հանել է անպատշաճ վարքի կասկածները Աֆղանստանում ՆԱՏՕ-ի զորքերի նախկին գլխավոր հրամանատար, գեներալ Ջոն Ալենի վրայից: Կասկածներն ի չիք են դարձել նրա և ֆլորիդացի ամուսնացած կնոջ նամակագրության ուսումնասիրությունից հետո: Այս մասին հայտնում է BBC-ն:
Գեներալին կասկածում էին Ջիլ Քելիին անպատշաճ նամակներ ուղարկելու մեջ: Այդ կինը ներքաշված էր սկանդալում, որն առաջացել էր ԱՄՆ Կենտրոնական հետախուզական վարչության նախկին ղեկավար Դևիդ Պետրեուսի շուրջը: Վերջինս պաշտոնաթող եղավ արտաամուսնական կապի պատճառով:
Պենտագոնում եկել են եզրակացության, որ Ալենի և Քելիի նամակագրության բովանդակությունը չի հակասում սպայի վարքի կանոններին:
Հետաքննության ընթացքում Ջոն Ալենը պահպանել է իր պաշտոնը, սակայն նրա նշանակումը Եվրոպայում ՆԱՏՕ-ի ուժերի գլխավոր հրամանատարի պաշտոնում հետաձգվել է: Դեռևս հայտնի չէ՝ նա կնշանակվի՞ այդ պաշտոնում, թե՞ ոչ:
Քելին, որը որպես կամավոր աշխատել է Տամպա քաղաքի ռազմաբազայում, սպառնալից նամակներ էր ստացել Պետրեուսի սիրուհուց ՝ Փոլա Բրոդուելից: Անվտանգության մարմիններին նրա դիմելու շնորհիվ է բացահայտվել Պետրեուսի և Բրոդուելի կապը:
