ՄԱԿ-ի Սիերա Լեոնեի գործով հատուկ դատարանը սկսել է Լիբերիայի նախկին նախագահ Չարլզ Թեյլորի գործի վերաքննումը։ Թեյլորը նույն դատարանի կողմից դատապարտվել էր 50 տարվա ազատազրկման՝ խռովարարներին աջակցելու համար, ասված է դատարանի հայտարարությունում։ Նույն տեղում նշվում է, որ դատական որոշման վերանայումը նախաձեռնվել է երկու կողմերից էլ։
Մեղադրող կողմը հորդորել է դատարանին «ուշադրության արժանացնել նրա հանցանքների ծանրությունը և մեղավորության աստիճանը»՝ պնդելով խստացնել պատիժը՝ հասցնելով այն 80 տարվա ազատազրկման։
Թեյլորի դատապաշտպանները 42 կետով բողոքարկման փաստաթուղթ են կազմել, որով պահանջում են իրենց պաշտպանյալի վրայից ամբողջապես հանել մեղադրանքները։ Բողոքարկման հայտարարության մեջ նշվել է, որ ավելի քան 2500 էջանոց դատական որոշումը հագեցած է գոյություն չունեցող փաստերով, շինծու ցուցմունքներով և հակասական եզրակացություններով։
Սպասվում է, որ վերջնական դատական որոշումը կընդունվի այս տարվա սեպտեմբերից ուչ ուշ։ Մինչև վճռի կայացումը Թեյլորը կպահվի Հաագայում գտնվող ՄԱԿ-ի ժամանակավոր մեկուսարանում։
