Գալիք նախագահական ընտրությունները Հայաստանի պատմության ամենաքիչ մրցակցայնություն ունեցող ընտրություններն են, բայց մենք դրա համար չենք կարող մեղադրել Սերժ Սարգսյանին: Այսօր լրագրողների հետ հանդիպմանը նման կարծիք հայտնեց տարածաշրջանային հետազոտությունների կենտրոնի տնօրեն Ռիչարդ Կիրակոսյանը:
«Չնայած այն հանգամանքին, որ մենք ունենք ոչ մրցակցային ընտրություններ՝ դա նախագաաի մեղքը չէ: Նա մեղավոր չէ, որ չունի ռեալ մրցակից: Այսպիսի ընտրությունները արտացոլում են Հայաստանի քաղաքական իրականությունը: Ընդդիմությունը մնում է շատ առանցքային և ոչ միավորված:
Մենք դեռևս տեսնում ենք անհատների և ոչ թե քաղաքական կուրսերի մրցապայքար: Սա նաև ցույց է տալիս քաղաքական դիսկուրսի ցածր մակարդակը»,- ասաց նա:
Բանախոսի գնահատմամբ` այսպիսի ընտրությունները նաև մարտահրավեր են Հայաստանի կառավարությանը, իսկ ամենալուրջ մարտահրավերը մասնակցության ցածր մակարդակը կլինի:
«Իրական մրցակցության բացակայությունը կհանգեցնի հասարակության հետաքրքրության բացակայության:
Այդուհանդերձ, այս ընտրությունները նախագահ Սարգսյանին նոր հնարավորություն կընձեռեն` ուժեղացնելու ժողովրդավարությունը: Այս ընտրությունները նրա համար կլինեն նաև հնարավորություն` ստեղծելու քաղաքական մանդատ: Նախորդ հինգ տարիների ընթացքում Սարգսյանը ավելի շատ Քոչարյանի թողած ժառանգությունն էր տանում: Նա իր վրա կրեց մարտիմեկյան իրադարձությունները, և քանի որ պարզ է, որ նա վերընտրվելու է, կարծում եմ` այժմ Քոչարյանի ստվերից դուրս գալու հնարավորություն կունենա»,- եզրակացրեց Ռ. Կիրակոսյանը:
