Նիկարագուայի դատարանը 30 տարվա ազատազրկման է դատապարտել 18 մեքսիկացի թմրավաճառների, ովքեր լրագրողների անվան տակ փորձել են անցնել երկրի սահմանը: Այս մասին հունվարի 19-ին հաղորդել է Agence France-Presse-ը:
18 թմրավաճառներից բաղկացած խումբը ձերբակալվել է Նիկարագուայի և Հոնդուրասի սահմանին` 2012թ.-ի օգոստոսին: Նրանք տեղաշարժվել են մեքսիկական Televisa հեռուստաընկերության լոգոտիպերով վեց մեքենաներով:
Դատապարտվածների թվում է մեկ կին՝ Ռաքել Ալատորե Կորեան, ով խմբավորման առաջնորդներից է:
Մեքենաներում սահմանապահները հայտնաբերել են ընդհանուր առմամբ 9,2 մլն դոլար: Ըստ հետաքննության տվյալների՝ այդ գումարով խմբավորումը ցանկացել է թմրանյութ գնել` հետագայում ԱՄՆ հասցնելու համար:
2012թ.-ի դեկտեմբերին կալանվածներին մեղավոր են ճանաչել թմրանյութի ապօրինի շրջանառության, ապօրինի եկամուտների օրինականացման և կազմակերպված հանցավոր խմբին մասնակցելու մեջ:
Կենտրոնական Ամերիկայի երկրները, այդ թվում` Նիկարագուան և Հոնդուրասը օգտագործվում են մեքսիկական նարկոկարտելների կողմից որպես տրանզիտային ճանապարհներ` Հյուսիսային Ամերիկա թմրանյութ փոխադրելու համար:
