««Ժողովուրդ»-ն ընդդեմ «X գրուպ»-ի, ԵԹՖ-ի, «Ակվատեկ»-ի, «10-ից 10» հրաձգարանի սեփականատեր Խաչիկ Խաչատրյանի» դատական առաջին նիստի օրը դեռ հայտնի չէ: Գործն ընդունվել է վարույթ, քննվելու է Արաբկիր և Քանաքեռ-Զեյթուն վարչական շրջանների առաջին ատյանի դատարանում՝ դատավոր Սարիբեկ Արամյանի նախագահությամբ (ֆինանսների փոխնախարար Վարդան Արամյանի եղբայրն է): «Առաջին լրատվական»-ի հետ զրույցում այս մասին ասաց «Ժողովուրդ» օրաթերթի լրագրող Սոնա Գրիգորյանը, ում գործարարը «պրաստիտուտկա» էր անվանել՝ ի պատասխան իրեն ոչ այնքան ցանկալի հարցի:
Ներկայացնելով միջադեպի մանրամասները` Ս. Գրիգորյանը նշեց, որ ինքը մինչ այդ էլ է զանգահարել Խաչատրյանին, սակայն այդ անգամ հարցը ակնհայտորեն գործարարին դուր չի եկել.
«Սկզբում տեղեկություն ստացանք, որ ԵԹՖ-ի ձվերը ժամկետանց են, զանգահարեցի` ճշտելու, նա էլ պատասխանեց, որ նման բան չկա: Հաջորդ օրը մեկ այլ տեղեկություն իմացա, որի համաձայն` Խաչիկ Խաչատրյանը խնդիրներ ունի ՀՀ պետական եկամուտների կոմիտեի նախագահ Գագիկ Խաչատրյանի հետ, և որ հարկայինը ԵԹՖ-ին տուգանել է: Միակողմանի տեղեկատվություն չտպագրելու համար կրկին զանգահարեցի Խաչիկ Խաչատրյանին, վերջինս ասաց՝ գրի-գրի, ազիզ ջան, երեկ էլ էիր գրել: Ես էլ ասացի` ինչո՞ւ եք անլուրջ վերաբերվում իմ հարցին, նա էլ, թե՝ աղջիկ ջան, ի՞նչ իրավունք ունես ինձ հարց տալու, ես էլ ասացի՝ որպես լրագրող ունեմ այդ իրավունքը: Խաչատրյանն էլ, թե՝ դու լրագրող չես, դու պրաստիտուտկա ես»:
Ի դեպ, Սոնա Գրիգորյանը նաև նշեց, որ իրենք երկու հայցով են դիմել դատարան՝ մեկով, որ գործարարը անձամբ ներողություն խնդրի իրենից, մյուսով էլ՝ թերթից. «Մենք գումար չենք պահանջել, դատը տանուլ տալու դեպքում Խաչատրյանը միայն ներողություն է խնդրելու ինձնից և «Ժողովուրդ» օրաթերթից»:
Իսկ թե երբ կլինի առաջին դատական նիստը` դեռ հայտնի չէ: