Հավաքական անվտանգության պայմանագրի կազմակերպության (ՀԱՊԿ) գագաթնաժողովի հիմնական թեմաներն են՝ պայքարը ահաբեկչության, թմրաթրաֆիքի դեմ, հավաքական անվտանգության համակարգի կատարելագործումը և Հավաքական ավիացիոն ուժերի ստեղծումը:
Կրեմլում կհանդիպեն Ռուսաստանի, Հայաստանի, Բելառուսի, Ղազախստանի, Ղրղզըստանի ու Տաջիկստանի նախագահները՝ հայտնում է TASS-ը:
Ինչես հայտնել է Ռուսաստանի նախագահ Վլադիմիր Պուտինի օգնական Յուրի Ուշակովը, բանակցությունների արդյունքով ստորագրության է պատրաստվում 22 փաստաթուղթ՝պետությունների ղեկավարների հայտարարությունը, 19 որոշում և 2 արձանագրություն:
«ՀԱՊԿ պետությունների ղեկավարների հայտարարության մեջ արտահայտված է մտահոգություն՝ կապված ահաբեկչության վտանգի աճի, Կենտրոնական Ասիայում ծայրահեղականության տարածման հետ, այդ թվում՝ հաշվի առնելով աֆղանական գործոնը: Ընդգծվում է Ուկրաինայում խաղաղության վերականգնման անհրաժեշտությունը և Լեռնային Ղարաբաղի հիմնախնդրի խաղաղ կարգավորումը, այսինքն՝ ֆիքսվում են տարածաշրջանային հիմնական հարցերի նկատմամբ դիրքորոշումները»,- նշել է Կրեմլի ներկայացուցիչը:
Գագաթնաժողովի աշխատանքին կմասնակցի ՀԱԿՊ միացյալ շտաբի ղեկավար, գեներալ-լեյտենանտ Ալեքսանդր Ստուդենիկինը:
Ուշակովը նաև հայտնել է, որ արձանագրությունների նախապատրաստվող նախագծերից մեկը վերաբերում է «տեղեկատվության ոլորտում հանցավոր գործունեության հակազդմանը»:
