Այսօր Հայաստան է ժամանելու Վրաստանի վարչապետ, «Վրացական երազանք» կուսակցության նախագահ Բիձինա Իվանիշվիլին:
Նշենք, որ սա Վրաստանի նորընտիր վարչապետի առաջին այցն է Հայաստան։ Տարածաշրջանային երկրներից պաշտոնական այցով Իվանիշվիլին առաջինն այցելել էր Ադրբեջան:
Մինչ այս ադրբեջանական ԶԼՄ-ներն արդեն հասցրել են տարածել պետական մակարդակի երկու խոշոր սուտ: Սկզբում, ըստ նրանց հաղորդած տեղեկությունների, վրաց կաթողիկոս Իլյա Երկրորդը հայտարարել էր, թե Լեռնային Ղարաբաղը պատկանում է Ադրբեջանին, այնուհետև հայտարարեցին, թե իբր Վրաստանի արտգործնախարար Մայա Փանջիկիձեն ասել է, թե Լեռնային Ղարաբաղի հակամարտության կարգավորումը հնարավոր է լուծել Ադրբեջանի տարածքային ամբողջականության պահպանման ճանապարհով:
Ի դժբախտություն ադրբեջանցիների՝ մի տեղեկությունը սկզբում հերքվեց վրաց պատրիարքարանի, մյուսն էլ՝ արտգործնախարարության կողմից:
Վրաստանի նախագահի ազգային փորամասնությունների հարցերով խորհրդական Վան Բայբուրդն «Առաջին լրատվական»-ի հետ զրույցում ասաց, որ Իվանիշվիլիի այցը Հայաստան, երկու երկրների հարաբերությունների լավացման համար կարևոր քայլ է. «Ամեն մի հանդիպում Վրաստանի և Հայաստանի ղեկավարության միջև շատ կարևոր է՝ իհարկե։ Քանի որ առաջին հանդիպումն է, կծանոթանան իրար հետ և նոր մի շարք կարևոր հարցեր կքննարկեն: Ամեն մի այսպիսի հանդիպում հայ-վրացական հարաբերությունների տան վրա կառուցվելիք մի քար է: Պետք է ասեմ, որ հայ-վրացական հարաբերությունները չեն սահամանափակվում 10 կամ 15 հարկով՝ անընդհատ բարձրանում-բարձրանում են, և կարծում եմ, որ հազարամյակից հետո այդ տունը կարող է 700 հարկանի լինել: Այս հանդիպումը նոր աղյուս է դնելու հայ-վրացական հարաբերությունների մեջ, ես դրանում համոզված եմ»,- ասաց նա:
Վան Բայբուրդի կարծիքով՝ Վրաստանի արտաքին գործերի նախարարն այդ հայտարարությունն, իրոք, չի արել, և դրա հետքերը պետք է փնտրել մեկ այլ երկրի հետաքրքրությունների շրջանակում. «Մայա Փանջիկիձեն չի արել այդ հայտարարությունը: Սրա հետքերը պետք է տեսնել ուրիշ երկրների շահերի մեջ: Նույնն էլ՝ Իլյա Երկրորդը: Վրաց պատրիարքարանը նույնպես հերքեց այդ հայտարարությունը: Ադրբեջանական ԶԼՄ-ները պարզապես ամեն ինչ ներկայացնում են սեփական շահերից ելնելով»:
Վրաստանի նախագահի խորհրդականի կարծիքով՝ հայ վրացական հարաբերությունները միայն առաջընթացի ճանապարհով են գնում: Վրաստանն անում է ամեն ինչ, որ բարյացակամ հարաբերություններ ուենանա իր բոլոր հարևան երկրների հետ: Հիմա էլ արվում են ինչ-որ քայլեր, որպեսզի բարելավվեն վրաց-ռուսական հարաբերությունները, բայց Ռուսաստանի կողմից, ցավոք սրտի, արվում են այնպիսի հայտարարություններ, որոնք կոռեկտ չեն և ի նպաստ երկրների հարաբերությունների բարելավման չեն»:
Վան Բայբուրդը տեղեկացրեց նաև, որ վրացական բանտերից ազատ են արձակվել ոչ թե երկու, այլ 4 հայ քաղբանտարկյալներ. «Վահագն Չախալյանի գործն էլ այնքան բարդ չէ, նրան որպես քաղբանտարկյալ՝ չէ, բայց համաներումով անպայման բաց կթողնեն»:
