Իշխանական քարոզչամիջոցներին «նյութով» ապահովող մեր երեսփոխանը` ԱԺ ֆինանսավարկային և բյուջետային հարցերի մշտական հանձնաժողովի նախագահ, ՀՀԿ-ական պատգամավոր Գագիկ Մինասյանը նախօրեին հայտարարեց, որ 2011թ. հունվար-փետրվար ամիսներին ՀՀ արտահանումն աճել է 30%-ով:
«Իսկապես արտահանումը շատ ավելի առաջանցիկ տեմպեր է արձանագրում, քան ներմուծումը: Սա խոսում է այն մասին, որ մեր արտահանման ենթակա ապրանքները մրցունակ են արտաքին շուկայում: Եվ այստեղ խոսքը չի գնում միայն հանքահումքային ապրանքների մասին, խոսքը գնում է նաև գյուղատնտեսական վերամշակվող ապրանքների, ակնեղենի, ոսկեղենի արտահանման մասին» ,-հայտարարեց Մինասյանը:
Նախ նշենք, որ 2011թ. հունվար-փետրվար ամիսներին, ըստ Ազգային վիճակագրական ծառայության հրապարակած ՀՀ սոցիալ-տնտեսական վիճակը 2011թ. հունվար-փետրվարին զեկույցի, արտահանումն աճել է ոչ թե 30%-ով, այլ 27%-ով: Երկրորդ` եթե արտահանման կառուցվածքից հանենք ՙհանքահումքային արտադրանքը՚, ապա կստացվի, որ նշված ժամանակահատվածում մեր արտահանումն աճել է 20%-ով: Այո, իհարկե, 20%-ն էլ ինչ-որ տեղ մեծ թիվ է, սակայն տվյալ դեպքում եթե այն համեմատում ենք Վրաստանի արտահանման հետ, տեսնում ենք, որ էլի էականորեն հետ ենք մնում: 2011թ. հունվար-փետրվարին Վրաստանի արտահանումը նախորդ տարվա համապատասխան ժամանակահատվածի համեմատ աճել է 36%-ով:
Գ.Մինասյանի նշած մյուս ապրանքները` ակնեղենն ու ոսկեղենը, որ մտնում են թանկարժեք և կիսաթանկարժեք քարեր, թանկարժեք մետաղներ և դրանցից իրեր ապրանքախմբում, այս տարվա հունվար-փետրվարին աճել են ընդամենը 5.4%-ով: Ուստի զարմանալի է, թե ինչու է Գ.Մինասյանը սա հիշատակել: Իրականում եթե նույնիսկ այս ապրանքախմբի ծավալներն էականորեն աճեին, միևնույնն է, սա այն ապրանքը չէ, որով երկրի մրցունակությունն են չափում: 2000-ականների սկզբին ադամանդ մշակելով մենք մեր արտահանումը իբր կտրուկ մեծացրեցինք, սակայն դա շուտով կանգ առավ, որովհետև նախ այդ մշակումը կոնկրետ երկրի պարագայում քվոտավորված է, և երկրորդ` ավելի ձեռնտու եղավ մեր մշակողներին տանել ադամանդի մոտ աշխատացնել, քան թե ադամանդը ՀՀ բերել: Արդյունքում այս ճյուղն էական անկում ապրեց ՀՀ-ում` կարելի է ասել անվերադարձ:
Վերադառնալով Գ.Մինասյանի նշած մյուս ապրանքախմբին` գյուղմթերքներին, նշենք, որ այստեղ, այո, աճ եղել է: Օրինակ` կենդանի կենդանիներ և կենդանական ծագման արտադրանքը և բուսական ծագման արտադրանքը աճել են ավելի քան 40%-ով, պատրաստի սննդի արտադրանքը` 22%-ով: Սակայն այս ապրանքախմբերի արտահանման ծավալը, և ընդհանրապես մեր արտահանումը այնքան փոքր է, որ ցանկացած թեթև ծավալի արտահանում կատարելիս երկնիշ աճ է արձանագրվում: Ասենք` Լոս Անջելեսում մի հայի սիրտ ՙՋերմուկ՚ է ուզում, դնում մի խմբաքանակ արտահանում են, ստացվում է երկնիշ աճ: Այնպես որ, մեր իշխանական գործիչների ներկայացրած թվերին ու ասածներին պետք չէ լուրջ վերաբերվել:
Գ.Մինասյանը ևս մի քարոզչական հնարք կիրառեց` հայտարարելով, թե բյուջեի եկամուտները այս տարվա հունվար-փետրվարին աճել են 11%-ով (պաշտոնական տվյալներով` 10.9%): Նա նույնիսկ խորացավ այն հարցի մեջ, թե ինչի շնորհիվ է նման երկնիշ աճն ապահովվել: Սակայն երբ համեմատում ենք այդ աճը այս տարվա հունվար-փետրվար ամիսների գնաճի հետ` 11.5% (կամ տասներկուամսյա գնաճը` 12.4%), տեսնում ենք, որ իրականում բյուջեի եկամուտները նվազել են: Մեր հարցին, թե արդյոք տեղի՞ն է հայտարարել 11%-անոց այդ աճի մասին այն պարագայում, երբ իրականում եկամուտները (իրական եկամուտները) նվազել են, Գ.Մինասյանը պատասխանեց, թե սովարաբար բյուջեի վերաբերյալ տվյալները անվանական արժեքով են ներկայացվում` ի տարբերություն, ասենք, ՀՆԱ-ի:
Այո, իհարկե, մենք հասկանում ենք, որ բյուջեի եկամուտները հաշվետվություններում անվանական արժեքով են ներկայացվում: Բայց տնտեսագիտությունն էլ հենց նրա համար է, որ աճերի վերաբերյալ նման ՙհուսադրող՚ ցուցանիշներ հայտարարելուց առաջ նախ փորձես հասկանալ իրական ցուցանիշները: Անվանական ցուցանիշները շատ քիչ բան են ասում: Մենք նաև հասկանում ենք, որ Գ.Մինասյանը այս պրիմիտիվ բաները շատ լավ պատկերացնում է: Պարզապես երկնիշ աճերի վերաբերյալ իշխանական քարոզչամիջոցներին համապատասխան նյութ տալու հերթական առիթ էր, որ Գ.Մինասյանը բաց չթողեց: Հիմա թերթ չկարդացող ու տնտեսագիտական կրթություն չունեցող մարդիկ հեռուստացույցով բյուջեի եկամուտների 11%-անոց աճ լսելուց հետո հո չե՞ն փորձելու հասկանալ` գնաճը հաշվի առնվա՞ծ էր, թե՞ ոչ, բյուջեի եկամուտները իրականում աճե՞լ են, թե՞ նվազել և այլն: Նրանց գիտակցության մեջ այդպես էլ կտպավորվի` բյուջեի եկամուտներն աճել են բավականին պատկառելի տոկոսով: