Անցած տարեվերջին հայկական ինտերնետ շուկա պաշտոնապես մուտք գործեց «Ռոստելեկոմ» ընկերությունը, որը տարվա սկզբին գնել էր հայաստանյան «ՋիԷնՍի-Ալֆա» օպերատորի 75 % բաժնետոմսերը՝ 22.5 մլն դոլար արժողությամբ: «Ռոստելեկոմը» հայտարարեց, որ «ՋիԷնՍի-Ալֆա»-ի ստեղծած ենթակառուցվածքների զարգացումը շարունակվելու է և ֆիքսված հեռախոսակապի, ինտերնետի հասանելիության ու ինտերակտիվ հեռուստատեսության ծառայությունների շուկայում գործունեությունն ընդլայնելու է:
Մեր երկրում ֆիքսված հեռախոսակապի, ինտերնետի հասանելիության ու ինտերակտիվ հեռուստատեսության ծառայությունների շուկայում ակտիվ գործունեություն է ծավալում նաև «Յուքոմ» ընկերությունը: Սակայն ոլորտի գիտակների դիտարկումներով՝ այս երկու ընկերությունները, ինչ-ինչ պատճառներից դրդված՝ չեն խաչաձևում իրենց ճանապարհները և առայժմ տարբեր ուղղություններով են զարգացնում ենթակառուցվածքները՝ հեռու մնալով մրցակցությունից: «Առաջին լրատվական»-ի հավաստի տեղեկություններով՝ դրա պատճառն այն է, որ «Ռոստելեկոմ»-ը պատրաստվում է կլանել «Յուքոմ»-ին: Այս մասին տեղեկություն տարածվել էր նաև անցած տարվա սկզբին, երբ «Ռոստելեկոմ»-ը ձեռք բերեց «ՋիԷնՍի-Ալֆա»-ն, սակայն «Յուքոմ»-ի ներկայացուցիչները հերքել էին այն:
Մեզ հետ զրույցում «Յուքոմ»-ի կոմերցիոն տնօրեն Արամ Բարսեղյանը կրկին հերքեց ընկերության վաճառքը, նաև նշելով, որ երկու ընկերությունները միաժամանակ գործունեություն են ծավալում Աբովյան և Վանաձոր քաղաքներում, իսկ Երևանում՝ Աջափնյակ և Էրեբունի համայնքներում:
«Վաճառքի դրված չենք և շուկայում գնորդ փնտրելու խնդիր չունենք: Աշխատում ենք նույն կերպ, ինչպես և նախկինում»,- հայտարարեց Ա. Բարսեղյանը:
«Ռոստելեկոմ»-ի մամլո քարտուղար Սիրանույշ Գյուրջինյանը մեզ հետ զրույցում ևս հերքեց «Յուքոմ»-ի գնման հնարավորությունը. «Այս պահին որոշում չկա: Ոչ մի բանակցություններ չկան»:
Նկատենք միայն, որ նման գործարքների մասին մտադրությունների կարգավիճակում ընդունված չէ բարձրաձայնել և միայն պայմանագրի ստորագրումից հետո է հայտարարություն տարածվում: Իսկ հայկական շուկայում նման խոշոր ընկերությունների համատեղ գոյատևում դեռ չի եղել:
