Թուրքական Hürriyet թերթի փոխանցմամբ,
Թուրքիայի ազգային հետախուզական կազմակերպության (MIT) նախկին աշխատակից, 63-ամյա Հալուք Աքթերը մահացել է խորհրդավոր հանգամանքներում: Դրանով վերջին 5 ամիսների ընթացքում թուրքական հետախուզությունը 6-րդ խոշոր կորուստն է կրել:
Աքթերին սպանված են հայտնաբերել Մուղլայի նահանգի Բոդրում շրջանում գտնվող իր տան լոգասենյակում. նրա վրա արձակվել է 3 հրազենային կրակոց:
Աքթերի կինը՝ Սեյհուն Գյուլեչը, ասել է, որ իր ամուսինը MIT-ում աշխատել է 1977-1990 թվականներին, իսկ MIT-ում նրա գործընկեր Ֆերդի Թամերը սպանվել էր դեռևս 1990 թվականի դեկտեմբերի 18-ին Ստամբուլում:
Հիշեցնենք, որ օրեր առաջ քրդական Fırat լրատվական գործակալությունը հաղորդել էր, որ վարչապետ Էրդողանը երկար տարիներ հակաիսլամական ամրոց հանդիսացած MIT-ում նախաձեռնել է իր համար անցանկալի անձանց «մաքրման» գործողություն, և դա հանձնարարել արտաքին քաղաքականության գծով իր նախկին խորհրդական, MIT-ի ներկայիս (16-րդ) ղեկավար Հաքան Ֆիդանին, որը համարվում է Էրդողանի վստահելի մարդը:
