Sony Pictures Entertainment ընկերությունը Հետաքննությունների դաշնային բյուրոյին ներգրավել է իր ֆիլմերի արտահոսքի հետաքննության մեջ: Այս մասին հայտնում է The Financial Times-ը՝ հղում անելով աղբյուրին: Ինչպես նշում է թերթը, ֆիլմերի ծովահենային տարբերակների հայտնվելը համընկել է Sony ընկերության վրա իրականացված ցանցահենային հարձակման հետ, սակայն դեռևս հայտնի չէ՝ այդ երկու միջադեպերը միմյանց հետ կապվա՞ծ են:
Sony Pictures-ի ներքին ցանցն անցած շաբաթ Guardians of Peace խմբի ցանցահենների կողմից «կաթվածահար» էր եղել: Sony Pictures Entertainment-ն ավելի վաղ հայտարարել էր, որ իր կայքը հարձակման են ենթարկել Հյուսիսային Կորեայի կողմից Չինաստանում աշխատող ցանցահենները:
Ինչ վերաբերում է համացանցում ֆիլմի անօրինական հայտնվելուն, ապա դա բավական հաճախակի բնույթ կրող պրակտիկա է, սակայն այս դեպքում ցանցահենները ստացել են ֆիլմերը՝ մինչ դրանք կհայտնվեին կինոթատրոններում:
